Në një komunikim online, kryeministri Edi Rama u ka dhënë përgjigje shqetësimeve të qytetarëve.
Ndër të tjera Rama u ndal edhe te punonjësit në të zezë dhe ata me vështirësi ekonomike, të cilët nuk përfshihen në asnjë prej paketave të qeverisë.
Kryeministri u shpreh se janë 70 mijë familje në këto kategori, për të cilët do të lëvrohet një bonus i veçantë, në formën e ndihmës direkte.
Rama sqaroi se vlera e ndihmës dhe periudha kur do të fillojë, do të përcaktohen këtë javë.
“Ata që punojnë në të zezë apo kanë vështirësi ekonomike, janë në grup prej 70 mijë familjesh që nuk janë të përfshira në skemën e ndihmës ekonomike por edhe pse kanë pasur një pikëzim më të lartë se i atyre që kanë hyrë në ndihmën ekonomike si aplikues për ndihmë ekonomike konsiderohen familje që në këtë situatë kanë një hall më të madh se të tjerët. Po punojmë për një bonus të veçantë që do të jetë në masën e një ndihme direkte, një herë për periudhën e mëtejshme dhe si do të jetë, sa do të jetë, kur do të ndodhë, do e kemi këtë javë të qartë. Do mundemi ta lajmërojmë edhe këtë shumë prej atyre që ankohen që janë në punë në të zezë, vështirësi ekonomike. Ndihmë ekonomike direkte.”- tha Rama.
Kujtojmë se pak ditë më parë, për punonjësit në të zezë, kryeministri tha se e përfitojnë pagën e luftës, duke denoncuar punëdhënësit.
