Nuk ka qetësi për Kosovën, pasi raportohet se gjatë natës në pjesën veriore të kenë ndodhur shpërthime.
Lajmi është bërë i ditur nga drejtori rajonal i Policisë për veriun, Veton Elshani, i cili ka tregur se shpërthimet kanë ndodhur në Mitrovicë të Veriut dhe në Zveçan.
Sipas deklaratave të tij njëri rast ka ndodhur teksa një automjet i Policisë po patrullonte, derisa ka shtuar se sulme ka pasur edhe në oborrin e stacionit policor në Mitrovicë të Veriut, por edhe në afërsi të stacionit policor në Zveçan.
“Në intervalin kohor prej orës 23:30 deri në orën 01:30, kanë ndodhur tri shpërthime. Një ka ndodhur në rrugë gjatë patrullimit të policisë, vetura e policisë është gjuajtur me gurë dhe dyshohet se është hedhur një shok bombë. Një ka ndodhur në stacion të Policisë në Mitrovicë të Veriut, saktësisht në oborr. Dyshohet se janë hedhur dy shok bomba. Shpërthimi tjetër ka ndodhur në Zveçan, në afërsi të stacionit të policisë”, ka thënë Elshani.
Gjithashtu ai ka theksuar se nga këto shpërthime nuk ka të lënduar, përpos dëmeve materiale që i janë shkaktuar veturës së Policisë nga hedhja e gurëve.
Në dy rastet tjera, nuk raportohet për dëme apo lëndime në njerëz. Dy ditë më parë (14 qershor) në afërsi të Leposaviç, 3 pjesëtarë të Policisë së Kosovës u morën peng peng nga Forcat Speciale Serbe ‘Kobra’. Ngjarja ndodhi kur tre policët ishin duke patrulluar në kufi, në vendin e quajtur Tresave/ Bare.
