Drejtori i Kadastrës në Berat, Ervin Nelaj është arrestuar ditën e sotme me akuzën për “korrupsion pasiv”. Prokuroria e Posaçme kundër Krimit dhe Korrupsionit ka lëshuar urdhërin për arrestin e tij teksa 38-vjeçari ka rënë në pranga rreth orës 18:30 nga forcat e policisë në Berat, në banesën e tij, në lagjen “30 Vjetori”.
Nelaj u arrestua në kuadër të operacionit “Aluizni” pas 9 muaj hetimesh dhe ndaj tij është marrë masa e sigurisë “Arrest me Burg”.
Sipas Drejtorisë Vendore të Policisë Berat Ervin Nelaj akuzohet se ka përvetësuar shuma të konsiderueshme parash në këmbim të dhënies së lejeve të legalizimit të pronave e banesave. Ai ishte prej 7-muajsh në krye të ASHK-së Berat. Më parë ai kishte punuar si inspektor e specialist në ALUIZNIN e Beratit prej 8-vitesh.
Kujtojmë që probleme të shumta dhe raste korrupsioni pa fund janë hasur më herët në Kadastrën e Vlorës ku shumë drejtor kanë dhënë dorëheqjen.
Njoftimi i Policisë:
BERAT.
Finalizohet operacioni policor i koduar “Aluizni”, për goditjen e korrupsionit pasiv të personave që ushtrojnë funksione publike.
Operacioni nga Drejtoria Vendore e Policisë Berat dhe SPAK-u.
Pas një hetimi 9-mujor u finalizua operacioni policor i koduar “Aluizni”, në kuadër të të cilit u ekzekutua masa e sigurisë “Arrest në burg”, për shtetasin E. N., 38 vjeç, banues në Berat, me detyrë drejtor i Agjencisë Shtetërore të Kadastrës në Drejtorinë Rajonale Berat.
Ky shtetas dyshohet se gjatë ushtrimit të detyrës ka përvetësuar shuma parash nga persona të ndryshëm, me qëllim pajisjen e tyre me dokumentet e lejes së legalizimit.
Vijon puna për dokumentimin ligjor të plotë të kësaj veprimtarie kriminale dhe për identifikimin e personave të tjerë të përfshirë në këtë veprimtari korruptive.
