Ashtu si qytetet e tjera të Shqipërisë edhe Bashkia e Vlorës ka marrë masa për dezinfektimin e ambjenteve publike.
Pas mbylljes së lokaleve dhe pezullimit të transportit publik, punonjësit e bashkisë kanë nisur dezinfektimin.
Për momentin në Vlorë nuk ka asnjë person të prekur nga koronavirusi.
Që nga dita e dielë me urdhër të kryeministrit do të mbyllet aksi nacionale Vlorë-Fier dhe vlonjatët do ta kenë të pamundur të largohen nga qyteti.
Kujtojmë se më herët janë dezinfektuar edhe qytete të tjera të Shqipërisë, si Durrësi, Tirana dhe Elbasani, pas regjistrimit të rasteve me koronavirus.
Aktualisht në vendin tonë janë shënuar 33 të infektuar dhe 1 viktimë nga koronavirusi.
ISHP njoftoi gjatë ditës së sotme se 2 të prekur që janë shtruar tek Infektivi, janë në terapi intensive.
Kryeministri Edi Rama ndërkohë ka urdhëruar ndërprerjen e qarkullimit të makinave private deri të dielën në mesnatë.
Më parë ndërkohë janë mbyllur shkollat, lokalet, fasoneritë, si dhe janë pezulluar tubimet.
Ushtria dhe policia kanë ngritur pika kontrolli në disa qytete, për të mbikëqyrur zbatimin e urdhërave të qeverisë.
