Koronavirusi i ka marrë jetën sot një tjetër politikani të njohur shqiptar të 20 viteve të fundit. Ai ishte infektuar me covid dhe ndonse ka shkuar edhe jashtë vendit për kurim, nuk ka mundur të fitojë betejën me sëmundjen.
Është fjala për ish-deputetin socialist Marko Bello, i cili ndërroi jetë sot në moshën 59-vjeçare.
Bello ishte infektuar me Covid, ndërsa kurohej në një spital në Turqi.
Marko Bello, lindi më 12 shtator të vitit 1961 dhe ishte deputet i Partisë Socialiste në Kuvendin e Shqipërisë. Bello po ashtu ka mbajtur postin e ministrit për Integrimin Evropian dhe ministër Shteti për Koordinimin Qeveritar.
Në periudhën 1997-2000, Marko Bello, ka shërbyer si ambasador i Shqipërisë në Rumani dhe më pas zv.ministër i Mbrojtjes.
Marko Bello, ishte dhe një nga anëtarët themelues të Këshillit të Ambasadorëve Shqiptarë.
I menjëhershëm ka qenë dhe reagimi i një prej miqve dhe kolegëve të tij, Presidentit Ilir Meta, i cili ka shprehur dhimbjen për humbjen e ish-kolegut Bello.
Përmes një reagimi në rrjetet sociale, Meta shkruan se, iku para kohë një mik, bashkëpunëtor, koleg dhe qytetar model.
“Sa shumë dhimbje nga kjo ikje e parakohëshme e një miku, bashkëpunëtori, kolegu, intelektuali aktiv, qytetari model e familjari shembullor! Zoti ju dhëntë forcë Silvanës, fëmijëve e të afërmve për këtë humbje kaq të madhe, që na tronditi të gjithëve këtë mëngjes! Ngushëllimet më të ndjera! Përherë i paharruar në kujtimet tona! LAMTUMIRË I SHTRENJTI YNË MARKO BELLO!”– shruan Meta.
/GazetaReforma.com/
