Vajza e Selim Velsulës, 65-vjeçarit që u vra me thikë nga kushëriri i tij, Hazbi Velsula, në fshatin Xibër-Murrizë të bashkisë Klos, ka shpërthyer në akuza të forta dhe kërkon drejtësi për të atin.
Ajo ka deklaruar se familja nuk do ta falë kurrë gjakun dhe se kërkon që autori të dënohet me burgim të përjetshëm.
“Ai nuk është në depresion. Ka ardhur me vetëdije, ka ardhur i përgatitur nga Tirana. Im atë ishte duke kullotur bagëtitë. Ne nuk e falim kurrë gjakun, të dënohet me burgim të përjetshëm ose ne do t’i shkojmë kësaj gjëje deri në fund. Nuk e falim gjakun. E ka tërhequr zvarrë, e ka lënë shuk aty dhe ka ikur,” u shpreh ajo e tronditur.
Ngjarja e rëndë ndodhi pasditen e 11 qershorit, rreth orës 16:00, në një zonë të pyllëzuar pranë pronës së viktimës.
Sipas të dhënave të policisë, 28-vjeçari Hazbi Velsula kishte ardhur nga Tirana dhe kishte thirrur kushëririn për një “muhabet”. Por në vend të një bisede, e ka sulmuar me thikë, duke e goditur disa herë në gjoks dhe në trup.
Selimi ka tentuar të largohet për të kërkuar ndihmë, por është rrëzuar disa metra më tej, ku dhe ka ndërruar jetë.
Zenel Velsula, një ndër të parët që ka shkuar në vendngjarje, tregoi:
“Viktima ishte njeri shumë i mirë, nuk kishte konflikte me askënd, as me autorin.”
Ai shtoi se trupi i Selimit është gjetur në një zonë me terren të thyer, ndërsa rreth gjashtë metra më tutje ishte telefoni i tij. Dyshohet se përveç thikës, autori ka përdorur edhe një dru të marrë nga një gardh aty pranë.
Vëllai i viktimës ndodhej rreth 500 metra larg, por për shkak të relievit nuk ka dëgjuar asgjë.
Rasim Velsula, një tjetër kushëri i viktimës, tha se nuk kishte njohuri për ndonjë konflikt mes palëve, por ngre dyshime për gjendjen mendore të autorit:
“Kemi hyrje-dalje me të dyja familjet. Unë them që autori ka qenë në depresion, nuk e shpjegoj dot ndryshe. Është i ri, i pamartuar. Nuk kishin konflikte me njëri-tjetrin. Ne e dinim sikur ishin jashtë shtetit, në Greqi, por ja që ndodhi kjo që ndodhi.”
Pas vrasjes, Hazbi Velsula është larguar menjëherë nga vendngjarja dhe është strehuar në banesën e të vëllait në Allias, Tiranë.
Më pas ka telefonuar të motrën dhe i ka rrëfyer krimin. Ishte kjo e fundit që njoftoi policinë. Brenda pak orësh, efektivët e komisariatit të Matit lokalizuan dhe arrestuan autorin në kryeqytet.
Në cilësinë e provës materiale, policia ka sekuestruar edhe thikën me të cilën u krye krimi.
Grupi hetimor, nën drejtimin e Prokurorisë së Rrethit Gjyqësor Mat, po vijon punën për të sqaruar plotësisht rrethanat dhe motivet e ngjarjes.
Trupi i pajetë i Selim Velsulës është dërguar në Institutin e Mjekësisë Ligjore për autopsi.
