Me mbërritjen e koronavirusit në Shqipëri, mjeku Pëllumb Pipero është kthyer në një figurat më të dashura për shqiptarët, falë këshillave dhe informacioneve që jep shpesh në daljet e tij publike.
Mbrëmjen e sotme, mjeku Pëllumb Pipero është shprehur se shërbimet e tij mjekësore në këto kohë i ka ofruar edhe jashtë Shqipërisë.
Pipero tregoi në “Zonë e lirë” se dy mjekë shqiptarë që jetonin në SHBA kanë komunikuar me anë të celularit me të, për të marrë këshilla rreth mjekimeve që duhet të përdornin ndaj pacientëve.
“Kam mjekuar në SHBA nga Shqipëria. Nuk e them këtë për të shitur mend, nuk dua të shesë mend. Jo se kam mjekuar por kam ofruar këshilla, kam orientuar mjekët. Më ka ndodhur që të më marrin në telefon dhe më thonë ‘nuk di, s’jam specialist dhe më kanë sjellë këtu’. Kështu që kam dhënë këshilla të vlefshme. E them këtë që ta kuptoni edhe ju se çfarë ndodh në SHBA,”– tha Pipero.
Për tu rikthyer në situatën në vendin tonë, infeksionisti foli mbi rastin e fasonerisë në Krujë, ku ditët e fundit u shtuan shumë raste me koronavirus.
“Do duhen së paku dy javë për të parë si është situata. Nuk duhet të marrim rastin e keq, duhet të respektojmë kushtet optimale për të parandaluar kthimin e masave. Nuk do kthehemi pas, ecuria e epidemisë tek ne, në opinionin tim, ka qenë e butë, e përballueshme me disa lëkundje, por që deri tani jemi në rezultate të mira brenda të keqes”, ka thënë Pipero.
Mjeku po ashtu ka treguar një grafik në emision që tregon ecurinë e pandemisë së koronavirusit në vendin tonë, duke shpjeguar situatën.
“Kemi një ecuri të pandemisë që ka qenë jo vetëm e zbutur, por e përballueshme nga kapacitetet shëndetësore. Testet ishin të fokusuar për të diagnostikuar herët, testet që përdoren, tamponët, konsiderohen standart i artë për të diagnostikuar. Bëjmë 200-250 testime dhe kemi 10-12-20 në ditë, që dëshmon se ecuria është e butë dhe në rënie. Indikator kryesor janë rastet e sëmura dhe të shtruara në spital, është koha të vendosim një ecuri të re në raport me situatën. Janë të rëndësishme për të konfirmuar se sa kemi qenë të ekspozuar dhe personat që kanë qenë më të rrezikuar. Jemi në fazën e dytë të epidemisë, ku jo vetëm diagnostikojmë, por po parandalojmë dhe evidentojmë si ka qenë ekspozimi dhe si është niveli i antitrupave, për të krijuar një pamje të tërë të ecurisë së pandemisë në vendin tonë”, ka thënë Pipero.
