Me ardhjen e koronavirusit në vendin tonë u vu re se njerëzit kishin turp të pranonin se mund të ishin infektuar, madje në disa raste fshihnin historitë e udhëtimit në vendet e prekura.
Por, siç duket ky mentalitet, që nuk dihet ende nga çfarë ushqehet, vijon ende në radhët e shoqërisë sonë, dhe 2 nga 7 rastet e fundit të raportuara ditën e sotme e ilustrojnë më së miri këtë.
Sipas Dosja.al dy persona të infektuar me COVID-19 prej tre ditësh kanë qëndruar në Urgjencën e Spitalit Ushtarak, sepse nuk e pranonin se ishin infektuar.
Në momentin që dy të sëmurët janë paraqitur në Urgjencë u është bërë grafia dhe mjekja u ka treguar se janë pozitivë ndaj COVID-19, por pavarësisht konstatimit të mjekes, dy pacientët nuk janë bindur se janë të infektuar.
Të infektuarit i janë nënshtruar tamponit vetëm një ditë më parë, duke rezultuar pozitivë, teksa të gjithë ata që kanë pasur kontakte me dy të infektuarit, do të duhet t’u nënshtrohen testeve.
Sakaq, edhe një prej rasteve të reja në Shkoder dyshohet se ka infektuar persona të tjerë sepse punonte si koordinator i OSHEE në Pukë, Shkodër e Vaun e Dejës.
Mësohet se ai gjatë ditës së sotme ka zhvilluar një takim në zyrat e OSHEE dhe pas mbledhjes, gjashtë punonjës të këtij institucioni, të cilët kanë patur më shpesh kontakt me korodinatorin, u janë nënshtruar analizave, teksa punonjës të tjerë të OSHEE-së, pritet që t’u nënshtrohen testeve.
Po ashtu, të gjitha pjesëmarrësit në mbledhje janë vetëkarantinuar tashmë.
I infektuar nga COVID-19, koordinatori i OSHEE-së fut në karantinë të gjithë punonjësit
Ka shkuar në 416 numri i të prekurve nga koronavirusi në vendin tonë, pasi në 24 orët e fundit janë shënuar vetëm 7 raste të reja, nga 162 teste të kryera.
Gjithashtu, gjatë 24 orëve të fundit janë shëruar 17 persona, duke e e çuar numrin në 182, ndërsa betejën me COVID-19 e kanë humbur 23 pacientë.
Në spitalin Infektiv ndodhen 50 persona, 6 prej të cilëve në terapi intensive, ku një është intubuar, ndërsa në spitalin “Shefqet Ndroqi” ndodhen 6 pacientë, 4 prej të cilëve janë intubuar.
