Më herët mëngjesin e sotëm, Presidenti i Republikës Ilir Meta paralajmëroi një konferencë të jashtëzakonshme për mediat në orën 11: 30, por pa bërë publik asnjë detaj.
Tashmë, konferenca urgjente po mbahet në Presidencë, ku Meta ka bërë publike fakte të reja për kreun e Këshillit të Emërimeve në Drejtësi Ardian Dvorani, ndaj të cilit ka depozituar edhe një kallëzim penal duke e akuzuar për aktivitet kriminal.
Meta tha se sot do të depozitohet një shtesë në kallëzimin penal ndaj Dvoranit dhe theksoi se atij duhet t’i ndalohet veprimtaria e organizuar kriminale.
“ Sot dua tju informoj mbi fakte të reja të dala në drita për të kallëzuarin Ardian Dvorani në KED. Sot do të depozitohet një shtesë në kallëzimin penal ndaj këtij shtetasi. Jo vetëm për të thelluar hetimin penal për veprat penale por edhe sepse të kallëzuarit Ardian Dvorani duhet t’i ndalohet ushtrimi i veprimtarisë kriminale për kapjen e gjykatës kushtetuese. Duhet t’i ndalohet veprimtaria e organizuar kriminale për vonimin e plotësimit të kësaj gjykate me qëllim që vendin e fundit vakant t’ia ruajë vetes.
Jam këtu për të treguar se sa larg shkon për kapjen e drejtësisë. Kryetari i Kuvendi i drejtohet kreut të KED duke i kërkuar informacion dhe kur i kallëzuari Dvorani, brenda pak orëve i përgjigjet Kuvendit duke keqinformuar”.
Kujtojmë se Meta nisi paditë për kreun e KED vitin që lamë pas, pasi e akuzon atë se ka shpërdoruar detyrën duke i dërguar dy lista njëherësh për dekretim, të cilin Presidenti nuk e bëri.
Kuvendi nga ana tjetër dekretoi Fiona Papajorgjin dhe Elsa Toskën, kurse Arta Vorpsi e cila ishte automatikisht e emëruar u ‘dogj’ nga Meta që dekretoi Xhaferllarin.
Po ashtu, kreu i vendit ka mbajtur një reagim të ashpër sa i takon ligjit të ri për betimin e gjyqtarëve, që Kuvendi miratoi të mërkurën, ndërsa e ka cilësuar këtë hap të maxhorancës një atentat ndaj Kushtetutës.
“Bazuar në kërkesën e Kuvendit dhe më pas të presidentit, Komisioni i Venecias i konfirmoi Kuvendit se në 13-14 shkurt do të vinte një delegacion. Kuvendi i Shqipërisë në mënyrë të pabesë, të pamoralshme, ndërkohë që anëtarët e Venecias mbërritën në Tiranë, në 12 shkurt votuan në seancën plenare, në errësirë të plotë ligjit për disa ndryshime mbi emërimin e gjyqtarëve, duke ia hequr të drejtën e betimit para Presidentit.Dhunohet neni 129 i Kushtetutës dhe parimet themelore të Kushtetutës. Votimi i këtij ligji është atentat i rëndë i mazhorancës ndaj Kushtetues, me qëllimin e vetëm kontrollin mafioz të qeverisë në Gjykatën Kushtetuese. Ky proces kërkon të nxi integritetin e punonjësve të gjykatës
Kjo s’do të pranohet kurrë nga presidenti. Ky nxitim, është fyerje që i bëhet organizmave, Komisionit të Venecias, ambasadave, ambasadorëve, që dolën në krah të mazhorancës, për të kërkuar thirrjen e Komisionit të Venecias, për këtë çështje aq e thjesht sa dhe vet abetarja. Me këtë krim, mazhoranca ka zhvleftësuar rëndësinë e tyre (Komisionit të Venecias). I kërkoj ndjesë Komisionit të Venecias që u keqpërdor nga mazhoranca në funksion të fillimit të realizimit të grushtit të shtetit.
Republika po përjeton gjendjen e rëndë të kapjes së shtetit. Unë konfirmoj se do të marr pjesë në seancën plenare të komisionit të Venecias ku do t’i njoh të gjithë të pranishmit me fakte dhe më të rënda të përpjekjes për të realizuar një grusht shteti në këtë vend. Rilindja është teatri dhe estrada nr. 1 e këtij shteti dhe e këtij populli.”, tha Meta.
Ndërkohë, dita e sotme është e mbushur me aktivitete dhe priten zhvillime të reja, sepse përveç ditës së Pavarësisë së Kosovës, që është një festë për të gjithë shqiptarët, në Bruksel po zhvillohet Konferenca e Donatorëve për Rindërtimin e Tërmetit të 26 nëntorit.
