Duke marrë parasysh situatën në të cilën ndodhet vendi ynë pas prekjes nga COVID-19, drejtori i DPSHTRR, Blendi Gonxhe ka njoftuar të gjithë qytetarët që mund të kenë patur gjobë, kamatëvonesa apo për të gjithë ata që u skadon kolaudimi i automjetit nuk kanë përse të shqetësohen.
Gonxhe ka bërë të ditur me anë të një njoftimi zyrtar, se do të pezullohet gjithçka deri në momentin që situata t’i kthehet normalitetit dhe rrjedhimisht qytetarët nuk do të kenë asnjë lloj penaliteti.
Gonxhe njofton se çdo afat e çdo skadencë, mbi taksat e qarkullimit të mjeteve rrugore dhe çdo dokumenti tjetër të lëshuar nga DPSHTRR, që nuk mundësohet dot si rinovim ose lëshim vetëm online dhe që konsiderohen prekluzive, do të pezullohen këto afate dhe kur të hapen sportelet do nisë llogaritja e ditëve të mbetura nga dita që u ndërpre zyrtarisht shërbimi.
“Çdo afat skadence i taksave apo rinovimet e lejeve të drejtimit do të pezullohet dhe do llogaritet nga momenti i hapjes së sporteleve.
Çdo afat e çdo skadencë, mbi taksat e qarkullimit të mjeteve rrugore dhe çdo dokumenti tjetër të lëshuar nga DPSHTRR, që nuk mundësohet dot si rinovim ose lëshim vetëm online dhe që konsiderohen prekluzive, do të pezullohen këto afate dhe kur të hapen sportelet do nisë llogaritja e ditëve të mbetura nga dita që u ndërpre zyrtarisht shërbimi.
Pra askush të mos ketë stres, as shqetësim për kamata a gjoba! Edhe për kolaudimin, ditët kur shërbimi është i mbyllur, edhe për ata, nuk do quhen vonesë e qytetarit ose pengesë për ta!”.
Në rang botëror deri tani janë shënuar 6,717 viktima dhe janë regjistruar 175,871 të infektuar në 162 shtete, ndërsa në vendin tonë deri tani ka humbur jetën 1 person dhe janë infektuar 51 të tjerë, teksa në Kosovë janë 15 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
