Një vit pas vrasjes së Liridona Ademajt, hetimet për këtë rast ende nuk kanë çuar në ngritjen e aktakuzës.
Prokuroria ka njoftuar se hetimet janë në vazhdim, por nuk ka dhënë informacione të tjera rreth zhvillimeve të fundit.
Deri tani, tre persona janë të dyshuar dhe mbahen në paraburgim, përfshirë bashkëshortin e Liridona Ademajt, Naim Murseli, i cili dyshohet se ka porositur vrasjen.
Ngjarja e rëndë ndodhi më 29 nëntor 2023 në fshatin Bërrnicë, kur Liridona u qëllua për vdekje në veturë në prani të fëmijëve të saj.
Hetimet kanë sugjeruar se Naim Murseli mund të ketë paguar 30 mijë euro për të realizuar vrasjen përmes Granit Plavës, ndërsa Kushtrim Kokalla dyshohet se ka ndihmuar për të gjetur dorasin.
Në muajin tetor 2024, Gjykata Themelore e Prishtinës ka vazhduar masën e paraburgimit për të dyshuarit, ndërsa hetimet po zhvillohen në disa drejtime për zbardhjen e motivit të vrasjes.
Shtetas të Suedisë, si Liridona dhe Naimi, rastin po e monitoron edhe Ambasada e Suedisë në Kosovë, e cila bashkëpunon me autoritetet lokale.
Vrasja ishte tentuar të fshihet si grabitje, ndërsa babai i Naim Murselit kishte dhënë një version alternativ, duke pretenduar se Liridona kishte rezistuar dhe kishte pasur një shumë parash në çantë.
Hetimet vazhdojnë për të zbardhur të vërtetën pas një viti të plotë. / Ekspres
