Një tjetër humbje është shënuar ditën e sotme nga bluzat e bardha. Bëhet fjalë për neurologun e spitalit të Kavajës, Mehmet Demrozi, i cili nuk mundi të fitojë betejën me Covid -19. Prej më shumë se një jave, 68 vjeçari ndodhej në intubim në spital privat në gjendje kritike për jetën.
“Covid-19 i merr jetën një tjetër mjeku. Sot është ndarë nga jeta doktor Mehmet Demrozi. Mjeku neurolog i spitalit të Kavajës nuk e fitoi dot betejën me koronavirusin për tu larguar përgjithmonë. Pas përkeqësimit të gjendjes, Dremozi, 68 vjeç ishte intubuar në një spital privat por nuk mundi ta mposhtë Covidin. Stafi i Kavaja.net i shpreh ngushëllime të sinqerta familjes, kolegëve dhe miqve për humbjen e njeriut tyre të dashur. Qoftë i xhenetit.”, thuhej në njoftimin e një prej faqeve të njohura në këtë qytet.
Kujtojmë se Covid vetëm dje iu mori jetën tre qytetarëve, një prej të cilëve ishte vetëm 22 vjeç. Sidorela Koça, e cila ishte shtatzanë, pasi ishte shtruar në spitalet covid në Tiranë, iu nënshtrua një operacioni ku mjekët ndërhynë për të hequr foshnjën para se e reja të ndërronte jetë.
Një tjetër viktimë ishte inspektoi i policisë Bujar Mema, 49 vjeç, nga qyteti i Fierit. Mema ishte infektuar me virusin dy javë më parë dhe ishte i shtruar në një nga spitalet e Covid këtu në kryeqytet.
Rasti tjetër u njoftua nga kryetarja e LSI, Monika Kryemadhi, e cila dërgoi një mesazh ngushëllimi për koordinatorin e kësaj partie në Astir. Viktima sapo ishte kthyer nga Gjermania dhe do e ndihmonte për fushatën elektorale.
