Kreu i Urgjencës Kombëtare , Skënder Brataj ka thënë se vendimet e Komitetit Teknik kanë qenë të bazuara në shkencë dhe rezultatet e modelit të përdorur nga Shqipëria u panë. Në një intervistë për “Fax News”, Brataj tha se ndër të tjera, vendi ka pasur edhe një system të vazhdueshëm vaksinimi.
“Vendimet e Komitetit? OBSH e përdorim si udhërrëfyes. Gjithmonë jemi bazuar në shkencë. Shqipëria ka pasur një model të vetin që e praktikoi. Shqipëria filloi me karantinën, që shumë e kritikojnë por unë them që na shpëtoi, dhe vazhdoi me një model masash të mesme. Rezultati u pa. Shqipëria ka disa karakteristika ndryshe nga bota. Në radhë të parë ka një mesatare moshe popullsie më të re. Së dyti ka pasur një sistem të vazhdueshëm vaksinimi”, tha Brataj.
Kreu i Urgjencës tha se vera do te jetë një aleat kundër virusit, ndërsa një numër shumë i madhe ka kaluar. Ai deklaroi se tashmë situata është më e qetë, pasi kushtet kanë ndryshuar.
“Gjatë verës do të shkojnë kështu. Vera është aleati jonë. Një numër shumë i madh e ka kaluar. Për fatin e mirë kemi mbi 1 milionë vaksina. Jemi në kushte krejt ndryshe dhe prandaj jemi më të qetë. Ky variant i ri përhapet më shpejt. Dihet se po qe se kap një person që nuk e ka kaluar sëmundjen do të shkaktojë simptoma. Është si puna e gripit. Tipike është rrufa. Edhe vetë gripi atë të shkakton. Numrat reale nuk janë ato, sepse shumë njerëz që kanë simptoma që nuk kërkojnë ndihmë fare”, ka thënë Brataj.
