Mbrëmjen e djeshme është sulmuar ambasada e Malit të Zi në Beograd.
Ministri në Detyrë për Evropën dhe Punët e Jashtme, Gent Cakaj, ka reaguar lidhur me këtë çështje.
Me anë të një statusi në Twitter, Cakaj ka deklaruar se sulmi ndaj Ambasadës së Malit të Zi nga ekstremistët serb është i papranueshëm.
Po ashtu, ministri ka shkruar se një mision diplomatik duhet t’i adresohet dialogut dhe jo t’i nënshtrohet vandalizmit.
Postimi i plotë i Cakaj:
‘Sulmi i dhunshëm ndaj Ambasadës së Malit të Zi në Beograd është absolutisht i papranueshëm. Një mision diplomatik nuk duhet t’i nënshtrohet vandalizmit. Pikëpamjet e ndryshme duhet të adresohen përmes dialogut. Nuk mund të ketë hapësirë për dhunë në shoqëritë demokratike.’
Kujtojmë se këto sulme janë bërë pasi Kuvendi malazez ka miratuar ligjin për liritë fetare.
Por, Kisha Ortodokse serbe në Malin e Zi e ka kundërshtuar.
Lidhur me këto sulme të Serbisë është krijuar edhe një peticion online, që paralajmëron kërcënimin e paqes së rajonit nga Beogradi.
Peticionit i janë bashkuar dhjetëra zyrtarë dhe ish-zyrtarë të mirënjohur, akademikë dhe figura të kulturës në Ballkan.
Ndonëse në 2006 Mali i Zi fitoi pavarësinë nga Ish-Jugosllavia, Serbia vijon të ketë pozicion udhëheqës në kishat ortodokse në Mal të Zi.
