Vetëm 39 deputetë të Kuvendit të Shqipërisë janë vaksinuar. Nga 140 që janë në total, 110 nuk e kanë ndërmarrë një veprim të tillë edhe pse një fushatë vaksinimi masiv ka filluar prej kohësh në vend.
Janë vetëm 39 deputetët e dalë nga zgjedhjet e 25 prillit që kanë marrë vaksinën anti-Covid, ndërsa të tjerët nuk kanë treguar prova se kanë marrë të paktën një dozë. Të tilla shifra i bën me dije gazetari Bledi Mane, i cili shkruan në profilin e tij në Facebook:
“Bëj si them unë, mos bëj si bëj unë/ VETËM 39 DEPUTETË JANË VAKSINUAR, 101 TË TJERË GËNJEJNË
***
Nuk duhet ti lejojmë të futen në Parlamentin e Republikës. Nga 140 deputetë të sapozgjedhur, vetëm 39 prej tyre janë vaksinuar, 101 të tjerë po i bëjnë bisht vaksinimit.
Lerini justifikimet, vaksinohuni publikisht, na tregoni certifikatën e vaksinimit, hyni në Kuvend të imunizuar dhe pastaj na detyroni ne qytetarëve të tjerë të vaksinohemi…”
Kur na ndajnë vetëm dy ditë nga nisja e punimeve të Parlamentit të ri, një pjesë e konsiderueshme e atyre që janë zgjedhur si përfaqësues së popullit, zgjedhin të japin një model që eviton dhe e konsideron të parëndësishëm vaksinimin.
Më e pakta është një detyrim moral përballë atyre që i kanë votuar, që këta deputetë të marrin vaksinën e ndër të tjera është një detyrim qytetar për të mos rrezikuar jetën dhe shëndetin e të tjerëve.
Kujtojmë se vaksinimi në Shqipëri është bërë i detyrueshëm për disa kategori, përfshirë këtu stafet mjekësore, arsimtarët dhe studentët. Studentët nuk do të lejohen në auditore nëse nuk janë të vaksinuar, gjithashtu do të ketë penalitete për arsimtarët pas afatit të fundit për të paraqitur dëshminë e vaksinimit, që është data 30 shtator.
Ndërkohë që rastet me Covid-19 në Shqipëri kanë ardhur në rritje, për shkak edhe të variantit Delta dhe një sërë kufizmesh janë vendosur në vend, ndër to edhe shkrutimi i orës policore në 23:00-06:00. Në mungesë të vaksinimeve, situata mund bëhet edhe më kritike, ndërkohë që ligjëvënësit e zgjedhur nuk japin shembullin e duhur.
Për më tepër, nëse vaksinimi i detyruar shtrihet në disa kategori, pse deputetët duhet të bëjnë përjashtim? Detyrimi i tyre moral është jo vetëm vaksinimi dhe demostrimi i certifikatës së vaksinimit, por edhe dëshmi me video për të treguar se janë vaksinuar realisht.
Në kohë të vështira për vendin, u takon përfaqësuesve të zgjedhur që të marrin të parët nismën për përmirësim të situatës, dhe në rastin konkret kjo do të fillonte me një veprim shumë të thejshtëm siç është vaksinimi kundër Covid-19.
