Nis vaksinimi në Shqipëri, Rama: Do të jem i pari që do bëj vaksinën, do shuaj konspiracionet!

Kryeministri Edi Rama, ka deklaruar se sot është një ditë historike për Shqipërinë kundër pandemisë, pasi fillon vaksinimi. Fillimisht do të vaksinohen kategoritë që janë më të prekura nga covid-19, si personeli mjekësor, policët dhe mosha e tretë.

Në konferencën për media së bashku me ministren e Shëndetësisë, Ogerta Manastirliu, Rama deklaroi se do ta bënte vet i pari vaksinën, për të mbyllur kështu sipas tij njëherë e mirë edhe konspiracionet rreth vaksinës.

“Një nga arsyet pse këto vaksina na u dhuruan, është edhe se unë jam kryeministër. Unë do të jem i pari që do të bëj vaksinën dhe do t’i mbyll këto konspiracionet nga vrima e çelësit.

Po e gjetët një vend që ka një datë të saktë se kur do të mbarojë vaksinimi atëherë hajdeni më pyesni prapë. (drejtuar gazetarëve).

Edhe me strategjinë e vaksinimit, nuk ka, nuk e gjen dot një vend që të ketë ndonjë diferencë nga pikëpamja e konceptimit dhe hartimit të strategjisë kundër virusit.

Dhe ne jemi në një hap me vendet e tjera, jo se jemi më të zotë, por jemi të vëmendshëm, lexojmë shumë dhe analizojmë shumë”, ka thënë para gazetarëve Rama.

Nga ana tjetër, në konferencë foli edhe ministrja e Shëndetësisë, Ogerta Manastirliu. Ajo u shpreh para gazetarëve se vaksina është një “game changer”, që duhet të luajë rol kryesor në frenimin e infëektimeve.

“Vaksina “game changer”, duhet të luajë rol kryesor në frenimin e infëektimeve. Ky është qëllimi kryesor, kontrolli i pandemisë.

Kjo është strategjia e katërt në lidhje me vaksinimin, çdo strategji ka ecur sipas parashikimit tonë, duke u konsultuar me planet më të mira të BE-së”, ka deklaruar ministrja e Shëndetësisë./Gazetareforma.com/