Pas mbërritjes së 38.400 dozave të vaskinës “AstraZeneca” mbrëmjen e djeshme, sot pritet të nisë vaksinimi i mësuesve, sikurse është lajmëruar më herët.
Mbrëmë kryeministri Edi Rama dhe ministrja e Shëndetësisë dhe Mbrojtjes Sociale, Orgeta Manastirliu ishin të pranishëm në ambientet e areoportit ndërkombëtar “Nënë Tereza” për të pritur dozat e reja.
Në fjalën e tij kryeministri Rama premtoi se sot do të nisi vaksinimi i mësuesve dhe pedagogëve, duke i kthyer shkollat në pika vaksinimi, në një pjesë të konsiderueshme të vendit.
Më tej Rama premtoi se shumë shpejt pritet të vijnë sërish një sasi e konsiderueshme vaksinash të “AstraZeneca” dhe “Pfizer”.
“Së shpejti do të vijnë sasi më të konsiderueshme. Me kompaninë AstraZeneca presim 60 mijë doza, ndërsa nga Pfizer rreth 30 mijë doza.”, u shpreh Rama nga aeroporti.
Pavarësisht furnizimit me vaksina, së fundmi dhe ato kineze dhe ruse, zëra të shumtë vënë në dyshime cilësinë e këtyre vaksinave dhe efektet anësore që shkaktojnë.
Për dozave të “AstraZeneca” që është ndër vaksinat që po furnizohet më së shumti vendi ynë, në mediat amerikane qarkullojnë lajme mbi efektet e padëshiruara që kjo vaksinë ka shkaktuar te pacientët.
Lidhur me këtë pasiguri, ka reaguar dhe shefja e departamentit të Epidemiologjisë në Institutin e Shëndetit Publik, Silva Bino. Ajo tha një ditë më parë se situata do të jetë nën monitorim. Sipas saj, nga 5 milionë, europianë që janë vaksinuar vetëm 20 kanë shfaqur probleme.
“Ne duhet të jemi të hapur ndaj ‘AstraZenca’, se mendohet se vaksina është e sigurt dhe nuk shkakton këto fenomene, por natyrisht do të monitorohet siç monitorohen për sigurinë të gjitha vaksinat që ne përdorim. Janë 5 milionë vaksina që janë aplikuar në vendet e BE-së dhe kemi vetëm 20 raste me këtë lloj patologjie që kanë sjellë bllokimin në disa shtete, e që po studiohet”, u shpreh Bino.
Më herët, ministrja Manastirliu tha se brenda kësaj jave do të përmbyllet vaksinimi i stafeve mjekësore, por kjo vështirë se mund të përmbushet, për sa kohë janë 23 mijë mjekë dhe infermierë, për të cilët do të duhen 46 mijë doza.
Shifrat e deritanishme flasin për as më pak e as më shumë sesa 26 635 të vaksinuar pa dhënë detaje se sa prej tyre i kanë marrë të dyja dozat.
