Një grup ekspertësh të Organizatës Botërore të Shëndetësisë kanë mbërritur ditën e premte në Wuhan në një nga spitalet që më shumë se një vit më parë kuroi pacientët e parë në Kinë me virusin e ri COVID-19. Ata pritet të nisin hetimet për të zbuluar më shumë për origjinën e virusit. Skuadra e OBSH u takua me zyrtarët kinezë më herët dhe eksploruan qytetin ku nisi përhapja e virusit. Rastet e para të asaj që u quajt “pneumoni nga shkaqe të panjohura” u raportuan në 27 dhjetor të vitit 2019. OBSH ka planifikuar të inspektojë edhe tregjet e mishit në Wuhan, Institutin e Virologjisë apo qendrën e kontrollit të sëmundjeve.
“Të gjitha hipotezat janë në tryezë ndërsa ekipi po ndjek shkencën në punën e tyre për të kuptuar origjinën e virusit COVID-19”, shkruan OBSH në Twitter.
Një fokus i mundshëm për hetuesit është instituti i virologjisë në qytet, një nga laboratorët kryesorë të hulumtimit të virusit në Kinë. Laboratori ka ndërtuar një arkiv të informacionit gjenetik në lidhje me koronavirusët e lakuriqëve të natës pas shpërthimit të SARS. Teza të ndryshme janë hedhur për prejardhjen e virusit. Sipas disa shkencëtarëve ai e ka origjinën nga lakuriqët e natës, ndërsa ka të tjerë që besojnë se virusi dol inga kontrolli në laboratoret e ushtrisë në Wuhan.
