Në Tiranë ka nisur e qetë protesta ndërsa në Elbasan është djegur një pemë krishtlindje. Kështu ka nisur dhe sot në orën 18:00 protesta e radhës pas vrasjes së 25-vjeçarit Klodian Rasha nga efektivi i policisë Nevaldo Hajdaraj.
Njejtë si dje, minutat e para duken të qeta tek Ministria e Brendshme po ashtu dhe te Kryeministria. Forcat e rendit kanë rrethuar godinat e rëndësishme, ndërsa përpara tyre janë mbledhur pak protestues deri tani.
Ndërkohë ka nisur protesta në Elbasan, ku disa të rinj i kanë vënë flakën një peme në qytet. Grumbullimet kanë filluar dhe në Durrës.
Kujtojmë se në tre ditët e para të protestës ka pasur tensione dhe dhunë nga ana e protestuesve të cilët kanë sulmuar efektivët, institucionet, dhe kanë shkatërruar semaforë, tabela, dhe gjithçka çfarë kanë gjetur në kryeqytet e që ju është dukur pronë shtetërore.
