Nipi i deputetit të PS-së, Ramazan Rraja i njohur edhe më herët si një person me probleme me ligjin, është dënuar nga drejtësia belge me 12 vite burg.
Gjykata vendosi dënim me 12 vjet burg për krerët e grupit kriminal shqiptaro-letonez, tre vjet më shumë se sa kishte kërkuar Prokuroria Publike, raportojnë mediat vendase. Gjatë gjykimit, Prokuroria Publike e cilësoi grupin si një organizatë kriminale “të lartë” që nxirrte fitime të mëdha nga kontrabanda dhe trafikimi i kokainës.
“Hetuesit kanë mundur të përcaktojnë organizimin rreth 36-vjeçarit Kaspars ‘The Boss’ N., falë pajisjeve të përgjimit që kishin vendosur në banesën e tij në Berchem. Hetuesit dëgjuan Kaspars N. dhe shqiptarin Ramazan R. duke folur për një kontejner që ndodhej në kalatën 1742. Një kontenier me banane që tashmë ishte kontrolluar nga dogana, por pa rezultat. Gjatë një kontrolli të ri, doganierët gjetën në tavan 57 kilogramësh kokainë”, shkruan media belge.
Telefonat celularë të anëtarëve të bandës, sipas medias, siguruan materiale të shumta për hetuesit. Shtretër hotelesh plot me para, foto jahtesh luksoze dhe orë me vlerë 655 mijë euro. Ata panë gjithashtu shumë foto të blloqeve të kokainës. Raja u dënua me dymbëdhjetë vjet burg dhe me gjobë prej 48 mijë euro. Përveç kësaj, ai duhet t’i dorëzojë shtetit belg 2.8 milionë euro pasuri kriminale. Me 12 vjet burg janë dënuar edhe dy togerët e tij, me 40 mijë euro gjobë. Anëtarët e tjerë të organizatës morën dënime nga katër deri në shtatë vjet.
