Deputeti i Partisë Socialiste, Niko Peleshi, është zgjedhur kryetar i ri i Kuvendit të Shqipërisë me shumicë votash. Nga 87 deputetë të pranishëm në sallë, 84 votuan pro kandidaturës së tij, ndërsa 3 votuan kundër.
Procesi u shoqërua me bojkot nga grupi parlamentar i Partisë Demokratike, i cili në vend të fletëve të votimit futi pankarta në kuti. Megjithatë, disa deputetë të opozitës zgjodhën të mos ndjekin këtë linjë. Mesila Doda, ndonëse ishte e pranishme, nuk mori pjesë në votim, ndërsa Tritan Shehu e hodhi fletën në kutinë e fshehtë.
Në proces morën pjesë edhe deputetët e rinj të partive të tjera. Ana Dajko, e partisë “Shqipëria Bëhet”, dhe Redi Muçi, nga “Lëvizja Bashkë”, votuan në favor të Peleshit. Ndërkohë, deputetët e partisë “Mundësia”, Agron Shehaj dhe Erald Kapri, munguan në votim.
