Një ngjarje tragjike me një viktimë ka ndodhur para pak kohësh në zonën e “Don Boskos” në Tiranë. Disa persona qëlluan me armë zjarri në një lokal në Tiranë duke lënë të vdekur 35-vjeçarin Erion Çela, si dhe të plagosur shtetasit Arben Dani, 46 vjeç, Azbi Selmani, 19 vjeç, Blerim Çela, 28 vjeç dhe Edmond Crroj, 41 vjeç.
Ndërkohë pas ngjarjes, Policia dhe Prokuroria nuk kanë ende asnjë autor të dyshuar për atentatin e ndodhur një javë më parë në Don Bosko. Një reagim ka pasur edhe Blerim Çela, vëllai i viktimës, Erion Çelës, ka dalë nga reanimacioni. Ai vijon të jetë i shtruar në Spitalin e Traumës. Dëshmia e tij konsiderohej kyçe për hetuesit. 28 vjeçari është rimarrë sërish në pyetje mesditën e djeshme dhe kjo pasi ai i tha policisë se nuk kishte konflikte me njeri.
Ndërkohë policia është e bindur se shkak i atentatit është konflikti për drogën. Nga ana tjetër, Urim Crroj i njohur edhe si Andi Duka, daja i dy vëllezërve Çela është shprehur se rreth orës 16:00 është marrë në telefon nga bashkëshortja e Erion Çelës e cila i ka treguar për ngjarjen. Ai sqaron se me vëllain e tij Edmond Crroj që mbeti i plagosur në atentat ka folur në telefon rreth orës 14:30, i cili i ka thënë se ishte në lokal por nuk i ka treguar se ku.
