Kompania ajorire “Wizz air” vazhdon të shesë bileta online nga Pizza për në Tiranë edhe pse jemi në mes të pandemisë Covid-19.
Rezulton se fluturimet e datave 18 dhe 20 qershor u anuluan dhe akoma nuk ka një përgjigje dhe një zgjidhje për pasagjerët që ngelën mbrapa.
Sipas “Dosja.al”, për këto dy data disa shqiptarë e kanë denoncuar ngjarjen, por ka shumë prej tyre të cilët “janë djegur” në lidhje me fluturimin e tyre.
Pasagjerët që kanë bërë denoncimin do udhëtonin për në datën 18 qershor dhe e kishin blerë biletën nga “E-dreems” dhe janë njoftuar një ditë para anulimit të fluturimit.
Ndërsa një pasagjer tjetër që do të udhëtonte në datën 20 qershor, me biletën e prerë nga “Wizz air”, u detyrua të shkonte deri në aeroportin e Pizës dhe të gjendej i vetëm në gjithë atë aeroport.
I vetmi fluturim i programuar nga Piza ishte ai drejt Tiranës dhe brenda aeroportit ndodheshin vetëm pastruesit.
E vetmja përgjigje që ka marrë prej tyre ka qenë se nuk ka asnjë fluturim dhe se aeroporti është i mbyllur, ndaj edhe të largohet ashtu siç kishin bërë edhe shokët e tij që nuk ishin njoftuar nga kompania për anulimin e fluturimit.
Pasagjeri ka shkruar se kanë qenë rreth 100 shqiptarë që prisnin jashtë aeroportit, por më kot.
Shumica e tyre humbën edhe shumën monetare të paguar ndaj kompanisë “Wizz air”, si ata që e prenë biletën drejtpërdrejt në faqen e kompanisë, por edhe ata që e prenë në faqet ndërmjetësuese.
Këta pasagjerë që humbën paratë e tyre për biletat tashmë të anuluara, u kanë bërë thirrje të gjithë shqiptarëve që të tregojnë kujdes ndaj kësaj kompanie, pasi po humbasin lekë, kohë por edhe nuk kanë për të gjetur zgjidhje.
