Pasi nuk arriti të kalonte procesin e Vetting-ut për pasuri të pajustifikuar, ish-prokurorja Rovena Gashi, e njohur si krahu i djathtë i ish-kryeprokurorit Adriatik Llalla, është paraqitur ditën e sotme para Komisionit të Posaçëm të Apelimit, për të kërkuar rikthimin e saj në detyrë.
Mbrojtjen e saj, ish-prokurorja ia ka besuar së motrës, Ema Gashi. “Nuk jemi njoftuar që do ishte ky vëzhguesi ndërkombëtar i ONM (Theo Jacobs) që do merrte sot pjesë në këtë seancë.” – tha Ema Gashi para Komisionit, për vëzhguesin i cili është paraqitur për të zëvendësuar vëzhguesen Mia Rosing.
Por anëtarët e Komisionit e kujtuan se gjithashtu pritet të ketë një vendim nëse ajo do të mund të pranohet apo jo si ndihmëse e Rovena Gashit.
Rovena Gashi u pezullua e më pas u shkarkua nga detyra në korrik të 2018-ës nga kryeprokurorja e përkohshme Arta Marku, pasi në procesin e Vetting-ut deklarimet e saj u konsideruan të pasakta.
Pas këtij vendimi, Gashi e dërgoi çështjen në Strasburg, duke shënuar betejën e parë kundër Vetting-ut, pasi e konsideroi vendimin të paragjykuar.
