Kuvendi i Shqipërisë pritet të votojë sot në seancë plenare projektligjin “Për Paketën e Maleve”, i cili synon të lehtësojë procedurat e pronësisë dhe ndërtimit në zonat malore, si dhe të krijojë stimuj fiskalë për investitorët.
Ky projektligj vjen në rendin e ditës pas vendimit të Komisionit të Ankimimeve dhe Sanksioneve, i cili rrëzoi kërkesën e Komisionerit Shtetëror të Zgjedhjeve, Ilirjan Celibashi, për pezullimin e tij, me argumentin se mund të cenonte barazinë e aktorëve ekonomikë para zgjedhjeve.
Deputetët pritet të diskutojnë mbi këtë iniciativë, e cila synon të nxisë investimet në zonat malore dhe të frenojë braktisjen e fshatit duke i dhënë banorëve lehtësi për zhvillimin e ekonomive të tyre lokale.
Opozita është shprehur kundër, duke argumentuar se ligji krijon një garë të mbyllur dhe vendos një procedurë të re për pronat private, e cila bie ndesh me kuadrin ligjor aktual.
Përveç këtij projektligji, Kuvendi do të shqyrtojë edhe disa marrëveshje me institucione ndërkombëtare.
Një nga marrëveshjet kryesore që pritet të ratifikohet është ajo me Bankën Evropiane të Investimeve (BEI) për hapjen e përfaqësisë së saj në Shqipëri.
Kjo marrëveshje, e nënshkruar më 24 janar 2025, synon të forcojë bashkëpunimin mes Shqipërisë dhe BEI-t, duke përshpejtuar projektet që mbështesin integrimin në BE.
Gjithashtu, në seancën e sotme pritet të miratohet një marrëveshje huaje me Fondin për Zhvillim të Abu Dhabi-t, për financimin e projektit “Sistemi i kamerave nën administrimin e Policisë së Shtetit – Smart City”. Ky projekt, me një vlerë prej 118.5 milionë dollarësh, synon të rrisë sigurinë publike dhe të përmirësojë monitorimin e territorit përmes teknologjisë së avancuar.
Kuvendi do të shqyrtojë gjithashtu dy marrëveshje të rëndësishme me Bashkimin Evropian, që lidhen me financimin e reformave dhe procesin e integrimit:
1. Marrëveshja e facilitetit për reformat dhe rritjen ekonomike, përmes së cilës BE do të akordojë 922 milionë euro për Shqipërinë, ku 29% janë grante dhe 71% hua.
2. Marrëveshja e huas për “Lehtësinë e Reformës dhe Zgjerimit për Ballkanin Perëndimor”, që përfshin një financim prej 657.4 milionë eurosh, të shoqëruar nga një grant prej 264.6 milionë eurosh.
Këto fonde do të mbështesin transformimin ekonomik të Shqipërisë dhe përgatitjen për hyrjen në tregun e përbashkët të BE-së.
Këto projekte dhe marrëveshje përbëjnë hapa kyç drejt forcimit të ekonomisë, integrimit evropian dhe përmirësimit të infrastrukturës dhe sigurisë në vend.
