Dy shqiptarët e shumëkërkuar, Dashnor Dumani dhe Artemis Stafa, janë ekstraduar nga Emiratet e Bashkuara Arabe drejt Shqipërisë.
Ata u kapën nga autoritetet e Dubait si rezultat i bashkëpunimit të ngushtë ndërmjet Interpol Tiranës dhe Interpol Abu Dhabit, në kuadër të operacionit të koduar “The Wanted”.
Dashnor Dumani, 40 vjeç, vëllai i Nuredin Dumanit, i penduar i drejtësisë dhe një nga figurat kyçe të botës së krimit në Shqipëri, akuzohet për disa vepra të rënda penale.
Ai dyshohet si autor i vrasjes së trefishtë në fshatin Bradashesh në vitin 2018, ku mbetën të vrarë shtetasit E. A., A. D. dhe E. D. Në vitin 2019, Dumani rezulton se ka marrë pjesë në djegien e një automjeti të përdorur gjatë një grabitjeje të armatosur në aeroportin e Rinasit, së bashku me shtetasin A. N.
Përveç këtyre akuzave, Dumani është dënuar më herët nga Gjykata e Durrësit me 4 vjet e 4 muaj burg për armëmbajtje pa leje, nga të cilat i kanë mbetur për të vuajtur edhe 1 vit e 4 muaj.
Ndërkohë, Artemis Stafa, 36 vjeç, i njohur si “truri” financiar i klanit Çopja, akuzohet për pastrim parash në kuadër të një organizate kriminale. Sipas hetimeve të Gjykatës së Posaçme, Stafa ka ndihmuar në pastrimin e të ardhurave të siguruara nga veprimtari kriminale, përmes shitblerjes së automjeteve, në favor të shtetasve F. G. (alias F. Ç.) dhe H. B. (alias H. Ç.), vëllezër të dyshuar për aktivitet kriminal.
Të dy të ekstraduarit janë pritur në aeroportin e Rinasit nën masa të forta sigurie, të shoqëruar nga efektivë të Policisë së Shtetit.
