Nga data 4 janar 2025 do të nisë aplikimi i pagesës në segmentin Thumanë-Kashar.
Në një njoftim për shtyp kompania koncesionare G2Infra bëri të ditur se kjo rrugë që është pjesë e korridorit Blu do të hyjë në regjimin e pagesës ashtu sikurse është parashikuar qysh në fillesat e saj.
Kalimi në këtë rrugë do të jetë me pagesë, vlera e të cilës do varet nga lloji i mjetit, por që nuk do të jetë më poshtë se 2.1 euro.
Kjo tarifë do të përllogaritet çdo vit, dhe kompania private Gener 2 do mund ta rrisë atë në varësi të luhatjeve të kursit të këmbimit lekë euro.
Duke pasur parasysh projektin e miratuar nga qeveria, aksi Thumanë-Kashar është një autostradë e kategorisë “A”. Projekti përfshin ndërtimin e 11 urave, 105 tombinove, 6 mbikalimeve dhe 6 nënkalimeve, si dhe 8 nyje të mëdha lidhëse për funksione hyrje-dalje të mjeteve.
Gjithashtu, përfshihet edhe një rrugë alternative pa pagesë.
Në vitin e parë plani bazë i të ardhurave për operim dhe mirëmbajtje është 26.85 milionë euro ndërkohë që shteti do të garantojë 8 milionë euro.
Në vitin e dytë që përkon me vitin 2025 plani bazë i të ardhurave është 25.58 milionë euro dhe garancia e shtetit ulet në 5.6 milionë euro.
Në vitin e tretë të operimit plani i të ardhurave është 25.10 ndërkohë që nëse nuk arrihet ky plan garancia e shtetit është për 3.92 milionë euro.
Aksi Thumanë – Kashar në shifra
Aksi fushor Thumanë – Kashar ka vlerën me të lartë të ndonjë rrugë në botë për kilometër:
59 euro për milimetër rrugë
590 euro për centimeter rrugë
59.000 Euro për metër rrugë
59 milionë euro për kilometer rrugë
