Kryeministri i Izraelit, Benjamin Netanyahu, prezantoi për herë të parë një dokument parimesh për menaxhimin e Rripit të Gazës në një mbledhje të Kabinetit të Sigurisë, pas një konflikti të gjatë. Dokumenti përcakton qartë planin për sigurinë dhe administratën civile në zonën e shkatërruar pas eliminimit të kapaciteteve ushtarake dhe infrastrukturës shtetërore të Hamasit. Sipas këtij plani, Izraeli do të marrë përsipër të garantojë sigurinë në Gaza, ndërsa çështjet civile do të drejtohen nga zyrtarë lokalë të pavarur, të cilët nuk janë të lidhur me grupe të caktuara që mbështesin terrorizmin dhe që kanë përvojë administrative.
Një tjetër aspekt kyç i propozimit të qeverisë izraelite është mbyllja e UNRWA-s (Agjencia e Kombeve të Bashkuara për Ndihmën dhe Punësimin e Refugjatëve Palestinezë), duke u mbështetur në akuzat për përfshirjen e supozuar të 12 anëtarëve të agjencisë në aktivitete terroriste më 7 tetor. Netanyahu propozon zëvendësimin e UNRWA-s me organizata ndërkombëtare humanitare që janë të përgjegjshme dhe të paanshme, për të menaxhuar nevojat humanitare dhe të ndihmës në Gaza. Dokumenti nuk përmend direkt Autoritetin Palestinez dhe përjashton çdo pjesëmarrje të tij në administrimin e re të Gazës.
