Autoritetet në një qytet kolumbian kanë marrë masa të rrepta ndaj njerëzve që refuzojnë vaksinat e koronavirusit, duke i urdhëruar ata të hënën të qëndrojnë në shtëpi ose të përballen me një gjobë, apo edhe burg.
“Ne duhet të mbajmë një qëndrim të fortë si drejtues … Të gjithë duhet të vaksinohen, nëse jo, ata nuk mund të qarkullojnë në komunën e Sucre”, tha kryetarja e qytetit Elvira Julia Mercado në Blu Radio.
Ajo dekretoi një urdhër qëndrimi në shtëpi, që zgjati tetë ditë, për njerëzit që ende nuk janë vaksinuar pavarësisht se bashkia kishte doza të mjaftueshme për të imunizuar të gjithë 28,000 banorët e saj. Deri më tani, vetëm 10,000 kanë zgjedhur të imunizohen, tha Mercado, duke fajësuar lajmet e rreme.
“Ka fe që ngurrojnë të vaksinohen, të rinjtë sepse u thuhet se nuk mund të dalin për pije … të tjerët se do të vdesin në dy vjet, se vaksina është antikrishti”, tha ajo.
Sipas dekretit, njerëzit e pavaksinuar mund të largohen nga shtëpia vetëm për të hyrë në shërbimet shëndetësore ose për të shkuar për t’u vaksinuar. Të gjithë qytetarët do të duhet të tregojnë një kartë vaksine për të hyrë në supermarkete, bare, disko, restorante, banka dhe dyqane.
Ata që kundërshtojnë masën rrezikojnë një gjobë të barabartë me 260 dollarë, dhe shkelësit e përsëritur mund të përfundojnë në burg. Masa do të rishikohet brenda tetë ditësh, bazuar në situatën e epidemisë atëherë.
Me 50 milionë banorë, Kolumbia është vendi i tretë i Amerikës Latineme numrin e vdekjeve më të larta për frymë pas Perusë dhe Brazilit me gati pesë milionë infeksione të konfirmuara dhe 121,000 vdekje të raportuara. Rreth 12.2 milion njerëz janë vaksinuar plotësisht.
Sucre është bashkia e parë në vend që vepron kundër refuzuesve të vaksinave, por Ministri i Shëndetësisë Fernando Ruiz ka paralajmëruar për hapa të ngjashëm më tej.
