Ashtu siç kanë parashikuar mjekët kjo javë do jetë e paqëndrushme dhe numri i të infektuarve do pësojë luhatje.
Kështu, ditën e sotme u rrit sërish numri i të infektuarve nga COVID-19, pasi u regjistruan 17 raste në reja në 24 orët e fundit, kurse dje u raportuan vetëm 6 raste.
Fatmirësisht, në dy ditët e fundit nuk ka ndërruar jetë asnjë person.
Sakaq, ka rënë ndjeshëm edhe numri i urgjencave me COVID-19 në spitalin Infektiv, pasi deri tani është regjistruar vetëm një urgjencë.
Mësohet se 4 persona janë të intubuar në spitalin “Shefqet Ndroqi”, kurse në spitalin COVID 1 nuk ka të intubuar, por 5 pacientë janë në terapi intensive.
Së fundmi, një tjetër lajm i mirë vjen nga spitali Infektiv, pasi ministrja Manastirliu me anë të një statusi në Facebook shkruan se një paciente 84 vjece ka lënë sot spitalin, pasi ka fituar betejën me COVID.
Më tej ministrja shkruan se 8 pacientë janë kthyer në shtëpi këto 24 orët e fundit dhe numri i përgjithshëm i të shëruarve ka shkuar në 154.
“Nënë Rukija plot 84 vjeç ka lënë spitalin #Infektiv e shëruar nga #COVID19
8 pacientë janë kthyer në shtëpi në 24 orët e fundit
Deri tani 154 qytetarë dhe staf mjekësor e kanë mundur #covid19”, shkruan Manastirliu.
Më herët ditën e sotme u raportua se mjeku Roland Xhaxho duket se ka probleme me frymëmarrjen, por nuk ka shfaqur komplikacione, kurse mjeku Andi Koraqi nuk ka vështirësi as në frymëmarrje dhe as komplikacione, por ka probleme me obezitetin.
Nga ana tjetër Adriatik Alimadhi, deputeti i vetëm shqiptar i prekur nga COVID-19, po trajtohen me oksigjen me maskë dhe ka saturim të mirë të oksigjenit në gjak.
