Presidenti i SHBA, Donald Trump, ka zhvilluar një bisedë telefonike me presidentin rus, Vladimir Putin, me fokus përpjekjet për t’i dhënë fund luftës në Ukrainë.
Sipas agjencisë Reuters, që citon burime nga Shtëpia e Bardhë, telefonata është pjesë e një iniciative për të zgjidhur një nga konfliktet më të përgjakshme që ka përfshirë Evropën që nga Lufta e Dytë Botërore.
Trump, i cili synon të mbahet mend si një ndërmjetës paqeje, ka shprehur vazhdimisht shqetësimin për gjakderdhjen në Ukrainë, duke e përshkruar luftën si një përplasje indirekte mes SHBA-së dhe Rusisë.
Para bisedës, administrata e tij bëri të ditur se presidenti amerikan është i irrituar si me qëndrimin e Putinit, ashtu edhe me atë të presidentit ukrainas, Volodymyr Zelensky.
Në një prononcim të shkurtër, Trump u shpreh se shpreson që kjo ditë të jetë “produktive” për përparimin drejt paqes.
Një zyrtar i Shtëpisë së Bardhë tha se telefonata ishte duke u zhvilluar. Putin po fliste nga vendpushimi rus në Detin e Zi, Soçi, ndërsa Trump ishte në Uashington.
Pak para telefonatës, zëvendëspresidenti i SHBA-së, JD Vance, u tha gazetarëve se Uashingtoni e pranoi se kishte një ngërç në përfundimin e luftës dhe se nëse Moska nuk ishte e gatshme të angazhohej, atëherë përfundimisht Shtetet e Bashkuara do të duhej të thoshin se ‘nuk ishte lufta e tyre’.
“E kuptojmë se ka një ngërç të vogël këtu. Dhe mendoj se presidenti do t’i thotë Presidentit Putin: ‘Dëgjo, a je serioz? A je i sinqertë me këtë?'” tha Vance ndërsa përgatitej të largohej nga Italia.
“Sinqerisht mendoj se Presidenti Putin, ai nuk e di tamam si të dalë nga lufta”, tha Vance, duke shtuar se sapo kishte folur me Trumpin”.
Ai tha se “duhen dy veta për të kërcyer tango. E di që Presidenti është i gatshëm ta bëjë këtë, por nëse Rusia nuk është e gatshme ta bëjë këtë, atëherë ne përfundimisht do të themi se kjo nuk është lufta jonë”.
“Do të përpiqemi ta përfundojmë, por nëse nuk mund ta përfundojmë, përfundimisht do të themi: ‘E dini çfarë? Ia vlente të provonim, por nuk do ta bëjmë më'”, përfundoi ai.
