Përballja me pandeminë e Covid-19 tregoi se bluzat e bardha janë heronjtë e vërtetë që janë në vijën e parë të luftës çdo ditë, duke shpëtuar jetën e njerëzve e duke rrezikuar edhe jetën e tyre.
Në botën qindra mjekë e infermierë kanë humbur jetën dhe mijëra të tjerë janë infektuar, ndërsa në vendin tonë virusi është treguar më i butë dhe fatmirësisht nuk ka marrë asnjë jetë mjeku.
Ndër të tjera pandemia i dha një mësim të mirë vendit tonë, ku bluzat e bardha nuk e kanë marrë vendin që meritojnë, qoftë nga kushtet e punës e pagat e ulëta, ashtu edhe nga mungesa e vlerësimit të shoqërisë shqiptare.
Pëllumb Pipero është tashmë një figurë e njohur dhe shumë e dashur nga të gjithë shqiptarët, pasi këshillat e tij kanë depërtuar në çdo familje nëpërmjet ekranit dhe tashmë ai është bërë zëri i të gjithë mjekëve që punojnë pa pushim.
Kështu, ditën e sotme mjeku i njohur infeksionist, Pëllumb Pipero ka marrë një vlerësim për kontributin e tij të çmuar në këtë situatë të vështirë për vendin, raporton News 24.
Me propozim të kryetarit të Bashkisë, Adriatik Mema, Këshilli i Bashkisë Skrapar i ka akorduar titullin “Qytetar Nderi”, profesor doktorit, Pëllumb Pipero, ndërsa është nderuar nga qyteti i tij i lindjes.
