Jemi vetëm 3 ditë larg ditës së zgjedhjeve të 30 qershorit. Këto ditë Shqipëria ka qenë në një situatë të rënduar politike. Kjo ka ndodhur pas çdekretimit të datës së zgjedhjeve dhe botimit të saj në Fletoren Zyrtare nga presidenti Ilir Meta.
Jo më larg se dje, u vendos të mblidhet një Komision Hetimor për të hetuar shkeljet e Kushtetutës nga presidenti Meta.
Ditën e djeshme po ashtu, presidenti Meta u ka bërë ftesë kreut të opozitës, Lulzim Bashës dhe kryeministrit Edi Rama për t’u takuar sot në Presidencë.
Presidenti Meta ka hyrë në Presdencë në orën 05:00 të mëngjesit. Ai do të jetë në pritje të Ramës deri në orën 13:00, me qëllim që kryeministri Rama të gjejë kohën për të qenë i pranishëm në këtë takim.
Por, ditën e djeshme kryeministri Rama e ka refuzuar ftesën e Metës, me justifikimin se është i zënë duke u marrë me mbylljen e fushatës elektorale. Refuzimin e tij ai e ka publikuar në rrjetin social Twitter.
Nga ana tjetër, kreu i Partisë Demokratike Lulzim Basha e ka pranuar ftesën dhe do të jetë në takim me Metën në orën 9:00.
Mësohet se kreu i Partisë Demokratike, Lulzim Basha ka mbërritur në Presidencë mëngjesin e së enjtes për t’u takuar me presidentin Ilir Meta.
