Në moshën 74-vjeçare, Skënder Cena është rikthyer në bankat e shkollës për të përmbushur një ëndërr të hershme që kishte mbetur pezull prej vitesh.
Sot në Kamëz, ai ishte maturanti më i moshuar që iu nënshtrua provimit të gjuhës angleze, pengesa e fundit për të marrë diplomën e shkollës së mesme.
I lindur më 8 nëntor 1951, Skënderi përfaqëson një shembull të rrallë të vendosmërisë dhe këmbënguljes.
Ai kishte ndjekur mësimet në ciklin part-time të Shkollës së Mesme Profesionale në Kamëz dhe në vitin 2016 kishte përfunduar të gjitha provimet, përveç atij të gjuhës së huaj.
Pasi kaluan afro 10 vite, ai vendosi të mos e linte të papërfunduar këtë etapë të jetës.
Duke qenë se diploma kërkon plotësimin e të gjitha kushteve, përfshirë provimin e gjuhës së huaj, ai aplikoi sërish për të marrë pjesë në Maturën Shtetërore, duke kërkuar dhe ndihmë për shkak të problemeve të shikimit.
Sot, me stilolaps në dorë dhe vullnet të pandryshuar, Skënder Cena u ul në bankën e provimit, duke dëshmuar se për të mësuar kurrë nuk është vonë.
Rasti i tij është një dëshmi e gjallë se pasionit për dijen nuk i vihen kufij dhe se forca e vërtetë qëndron tek ata që nuk dorëzohen asnjëherë.
