Ndërsa Kuvendi po vijon me përplasje e debate të forta, përballë Bashkisë Tiranë është duke u mbajtur protesta e radhës nga opozita. Afera “5D” ka bërë bashkë sërish dhjetëra qytetarë dhe përfaqësues të opozitës. Mes tyre edhe nënkryetari i Këshillit Bashkiak të Tiranës, nga opozita, Dorian Teliti. Në fjalën e tij para qytetarëve ai u shpreh drejtësia se duhet të merret me “peshkaqenët e mëdhenj” jo me të vegjlit. Gjithashtu ai deklaroi se rezistenca duhet të vijojë nga qytetarët deri në arritjen e objektivave.
“Të hënën një akt tjetër kriminal i denjë për vjedhjet e deritanishme, në Linzë u mor me qira 600 metra katrorë për një çerdhe, sepse fëmijët e Tiranës nuk kanë çerdhe. Por s’mund të marrësh me 15 euro metri në atë zonë. Më habit fakti se si ky njëri nuk tërhiqet nga vjedhjet e abuzimet. Kjo duhet të marrë fund një orë e më parë. Në këto zyra nuk ka vend për njerëz që shkelin ligjin. Sot prokuroria duhet të flasë. Mjaft më u mor me morrat e vegjël e cironkat, le të merret me peshkaqenët e mëdhenj. Korrupsioni në piedestalin 100 përqind nuk duhet të ketë vend në vendin tonë. Të rezistojmë, siç jemi sot të vijojmë deri në arritjen e objektivave tona”, tha Teliti.
