Ish-futbollisti i Shqipërisë, Eros Grezda, ka pranuar se në Kombëtare, ka diçka që nuk shkon. Në një intervistë për shtypin e shkruar, sulmuesi kuqezi u shpreh: “Normalisht që i kam ndjekur ndeshjet e Kombëtares. Pikë së pari, mua më mungon futbolli. Stërvitjet, të jem në fushë dhe të luaj. Pastaj, sigurisht që edhe Kombëtarja apo çdo gjë që ka lidhje me futbollin.
Unë shpresoj që Kombëtarja të bëjë sa më mirë të jetë e mundur në çdo ndeshje, me cilindo kundërshtar. Të paktën, në këto tri ndeshje të sigurohen gjashtë pikët. Personalisht e shoh rupin shumë të vështirë. Duke e hequr mënjanë Anglinë për vetë forcën që ka, shoh Hungarinë një skuadër shumë të fortë, një ekip shumë i ekuilibruar. Polonia është jo më pak dhe ka lojtarë si Levandovski.
Shikoni, unë pak a shumë i di të gjitha rastet e kontestuara. Mirëpo, ju lutëm mos më kërkoni t’i komentoj ato që di për të tjerët. Do të flas vetëm për veten. Normalisht, aty ka diçka që nuk shkon, meqenëse kanë ndodhur disa raste dhe nuk është vetëm një. Mirëpo, secili ka problemet dhe arsyet e veta. Unë kam pasur arsyet personale dhe kam vepruar ashtu”, përfundoi ish-sulmuesi i Shqipërisë, Eros Grezda.
