Një nga të shumëkërkuarit për trafik ndërkombëtar droge është arrestuar në Spanjë.
Bëhet fjalë për 34-vjeçarin Juxhin Drazhi, i cili u kap në qytetin Almuñécar të Granadës, pas një operacioni të organizuar nga Garda Civile spanjolle.
Arrestimi i tij u bë me qëllim ekstradimi drejt Shqipërisë, ku ai është i akuzuar për disa vepra të rënda penale në kuadër të operacionit “Ura”.
Drazhi ishte pjesë e grupit kriminal të drejtuar nga Elvis Doçi, që merrej me trafikimin e lëndëve narkotike drejt Italisë dhe vendeve të tjera të BE-së.
Ai ishte shpallur në kërkim ndërkombëtar prej disa muajsh dhe ndaj tij Gjykata e Posaçme kishte caktuar masën e sigurisë “arrest me burg” për tre akuza: trafikim i lëndëve narkotike në bashkëpunim, pjesëmarrje në grup të strukturuar kriminal dhe kryerje veprash penale nga grup i strukturuar kriminal.
Arrestimi i tij në Spanjë ndodhi në një vilë luksoze, e izoluar dhe e pozicionuar në një zonë të lartë, që i mundësonte mbikëqyrjen e ambientit përreth.
Autoritetet spanjolle kishin vënë re se në banesë ishin vendosur masa të forta sigurie, çka ngriti dyshimet se aty fshihej një person me rrezikshmëri të lartë.
Sipas raportimeve, Drazhi nuk dilte kurrë nga vila dhe përdorte persona të tjerë për të kryer blerjet dhe nevojat e përditshme, në mënyrë që të mos binte në sy të autoriteteve.
Në momentin që u rrethua nga forcat e policisë, ai tentoi të arratisej nëpërmjet një rruge malore, por u kap pas një ndjekjeje nga oficerët.
Gjatë kontrollit në banesë u gjetën dokumente të falsifikuara, pasaportë, kartë identiteti dhe patentë shoferi, që i shërbenin për të mbuluar identitetin e tij të vërtetë.
Po ashtu, u sekuestruan sende luksoze, përfshirë një orë e shtrenjtë, si dhe një armë zjarri me dy karikatorë, 13 fishekë dhe një silenciator, të cilat ishin fshehur pranë zonës ku ai tentoi të arratisej.
Ndaj Drazhit ishte lëshuar më herët edhe një urdhër për sekuestrimin e disa pasurive në Shqipëri, përfshirë kompaninë “Majestic Construction” dhe nëntë prona të tjera që dyshohet se janë përfituar nga aktiviteti kriminal.
Operacioni “Ura” ka goditur tre grupe të fuqishme kriminale të përfshira në trafikun ndërkombëtar të kokainës dhe heroinës, pastrimin e parave dhe shpërdorimin e detyrës.
Hetimet për këtë rrjet të gjerë nisën në vitin 2016 dhe u intensifikuan pas vitit 2020, kur përmes përgjimeve dhe mesazheve të koduara në platformën SkyECC u zbuluan transaksione të dyshimta në vlerën deri në 5 milionë euro në para kesh.
