Me një akt normativ, më 20 korrik 2020, qeveria shqiptare ka mbyllur baret dhe restorantet që punojnë natën, përfshirë diskot dhe lokalet me muzikë. 3 milionë është gjoba për ata që kapen në kundërshtim me urdhrin. I njëjti vendim është marrë një javë më parë në Berlin, por atje gjykata e anuloi këtë akt. Por Kryeministri Rama që ndjek hapa pas hapi Kancalaren Merkel, duket se merr vetëm ato masa që i interesojnë. Mbylljen e bareve me muzikë mund ta ketë kopjuar diku tjetër.
Në Berlin
“Shtetrrethimi është pezulluar për momentin pasi gjykata e konsideron atë jo proporcional në funksion të masave të tjera të marra për të luftuar pandeminë”,- tha një zëdhënës i Gjykatës Administrative në Berlin.
Vendimi erdhi pas ankesave të një numri të madh biznesesh të cilët kanë kundërshtuar masat kufizuese të vendosura për shkak të rritjes së shifrave të Coronavirusit. Autoritetet në Berlin një javë më parë vendosën mbylljen e bareve dhe restoranteve nga ora 23:00 deri në orën gjashtë të mëngjesit.
Gjykata tha se nuk kishte asnjë provë se baret dhe restorantet të cilët respektonin rregullat ekzistuese mbi mbajtjen e maskave dhe distancës, kontribuonin në shifrat e të prekurve me COVID 19.
Ishin 11 pronarë restorantesh të cilët kundërshtuan vendimin e qeverisë për mbyllje. Shumë prej tyre shprehen se kjo masë do të ishte katastrofike pas edhe pezullimit të pranverës. Ata theksojnë se është e pakuptueshme për ta në një kohë kur është hequr shtetrrethimi, atyre të mos u lejohet të shesin alkool pas orës 23.
Edhe në çeki, 26 prill 2020, Gjykata hodhi poshtë këtë lloj ndalimi për bizneset. Gjykata Administrative e Pragës i deklaroi kufizimet në krizën e Coronës si jo në pajtim me ligjin, qeveria çeke brenda pak orësh i anuloi të gjitha kufizimet në lirinë e lëvizjes dhe të biznesit.
Në Tiranë
Në Shqipëri, megjithë kundërshtimin e bizneseve dhe të artistëve është pezulluar cdo aktivitet si disko, bare me muzikë, restorante etj, që punojnë natën.
“Kemi konstatuar që në këtë periudhë ato janë kthyer në vendgrumbullime të rinjsh, ku injorohet totalisht zbatimi i masave për parandalimin e infeksionit, duke i shndërruar në vatra potenciale të infeksionit. Të rinjtë bëhen kështu bartës të virusit në dëm të më të moshuarve. Nga sot, qeveria i thotë stop kësaj sfide që i bëhet rregullave të vendosura për të parandaluar pandeminë”, do të thoshte me këtë rast Ministrja e shëndetësisë. Ogerta Manastirliu
Mbrojtjen shkencore të këtij akti të paprecedentë që dëmton biznesin, e ka bërë ministri i Turizmit, Blendi Klosi, sipas të cilit, valët e muzikës përhapin virusin e Covid 19.
/GazetaReforma.com/
