Sipas rishikimit më të fundit nga portali global i të dhënave mbi çmimet kudo në botë, Numbeo, Shqipëria u rendit në vendin e 89, ndër 131 vende të listuara. Në raport me vitin 2020, kosto e jetesës në Shqipëri në vitin 2021 do të jetë 3.8 pikë përqindje më e lartë se në vitin 2020.
Shqipëria u ngjit në renditje me 6 vende. Nga 36,9 për qind që ishte indeksi në vitin 2020, më 2021 do të jetë 40.5 %, zhvillime këto që tregojnë se në Shqipëri jetesa po bëhet më e shtrenjtë. Baza e indeksit është kosto e jetesës në New York, raporton, Numbeo.
Indeksi i Kostos së Jetesës i matur nga NUMBEO përjashton qiranë dhe është një tregues relativ i çmimeve të mallrave të konsumit, përfshirë ushqimet, restorantet, transportin dhe shërbimet publike.
Mali i Zi dhe Shqipëria u renditen si vendet me koston më të lartë të jetesës në Rajon, sipas indeksit në NUMBEO. Serbia, Bosnja dhe Maqedonia do të kenë një kosto më të lirë jetesë se sa Shqipëria këtë vit, në një kohë që i kane të ardhurat nga pagat së paku 30 për qind më të larta se shqiptarët.
Sipas Numbeo-s Tirana është qyteti me koston më të lartë të jetesës në Shqipëri me gati 18 pikë për qind më shumë së mesatarja kombëtare. Në kryeqytet kosto e jetesës është 58 % e kostos së Neë York-ut.
Një familje me katër persona në Tiranë pa qiranë ka një kosto mujore jetese 182 mijë lekë, ndërsa një person i vetëm ka një kosto mujore 51 mijë e 700 lekë, pa qiranë. /Gazetareforma.com/
