Ruzhdi Kurtishaj, kryetar i Tranportit Rrugor, ka zhvilluar ditën e sotme një një takim me kryeministrin, Avdullah Hoti dhe Ministrin e Infrastrukturës, Arban Abrashi në lidhje me vendimin për izolim 7 ditor për ata që ktheheshin nga vendet fqinje me rrezik të lartë nga koronavirusi midis tyre edhe Shqipëria.
Në një intervistë për IndeksOnline Kurtishaj ka thënë se ka marrë garancinë nga Hoti dhe Abrashi, që s’do të ketë masë të vetëizolimit për kosovarët që kthehen nga vendi ynë, pasi sipas tij vatra e COVID-19 s’është në Shqipëri, por në Kosovë.
“E para, vatra e krizës së pandemisë nuk është në Shqipëri, por në Kosovë. E dyta, çështja e krijimit të imunitetit të përgjitshëm të popullatës, pra perderisa shumë qytetarë tashmë i kanë pagat shumë të ulëta, shumë nga ta s’kanë mundësi fare të shkojnë në Shqipëri, derisa para nesh është sezona e vjeshtës dhe e dimrit, andaj është më së e domosdoshme të krijohet edhe imuniteti për t’u përballë me këtë virus. Prandaj është e domosdoshme që ata të qëndrojnë për disa ditë në diell, përballë detit apo në jod.
Çështje tjetër, është ajo e pagesës së hoteleve, qoftë nga kompanitë, qoftë nga agjensionet turistike apo edhe nga qytetarët që kanë dhënë avansin e tyre. Pra, kush do të merret me ta.
Duke i pas në konsideratë të gjitha këto, unë ja kam spjegu detajisht secilit ministër dhe tashmë kemi edhe koordinimit, garancinë që s’do të ketë vetëizolim për qytetarët e Kosovës që kthehen nga Shqipëria,” tha Kurtishaj.
Kurtishaj në fund thotë se ky është një lajm i mirë për të gjithë ata që kanë planifikuar Festën e Bajramit apo ditë e fundjavës t’i kalojnë në brigjet e bregdetit shqiptar.
Ndërkohë kujtojmë se deri më tani numri i rasteve pozitivë me Covid në Kosovë është 7.652 raste nga 35.121 persona të dyshimtë në virusin SARS-CoV-2, me gjithsej 192 raste të vdekjes të cilët kanë pasur sëmundje të tjera shoqëruese.Ndërsa ditën e sotme janë regjistruar 7 humbje jete dhe 239 raste të reja.
