PPP-të kanë qenë një problem i madh sidomos pas skandaleve të dala së fundmi me ndërtimin e Lotit të Partë të Unazës së re. Të gjendur para këtyre fakteve Agjencia e Prokurimeve Publike ka marrë përsipër që të fusë një kriter të ri, të rëndësishëm si ligj.
Sipas saj “Të gjithë ata persona që kanë qenë të dënuar me vendim nga gjykata nuk do të mund të marrin pjesë në tenderë publikë.”
Këto kritere janë forcuar dhe kjo sjell edhe ndryshimin e ligjit, të cilat parashikojnë ndalimin e dhënies së kontratave publike operatorëve ekonomikë që drejtohen nga persona të dënuar me vendim të gjykatës së formës së prerë.
Sipas kësaj agjencie, që prej datës 1 shkurt nuk ka më lëshime për sa i përket këtij kriteri.
Ligji u miratua nga qeveria në tetor të vitit të kaluar, si pjesë e paketës së ndryshimeve që kanë për qëllim luftën kundër kriminalitetit.
Në këtë mënyrë çdo subjekt që do të jetë ofertues në lidhje me projekte të ndryshme do të duhet të deklarojë nëse ka qenë i dënuar për vepra penale. Në këtë deklaratë duhet të ketë informacion të plotë edhe për çdo person që ka kompetenca përfaqësuese, vendimmarrje ose kontrolluese në subjektin.
Më pas Agjencia e Prokurimeve Publike do të bëjë edhe verifikimin e deklarimeve të bëra në regjistrin elektronik të gjendjes Gjyqësore. Këto ndryshime në ligj vijnë në një kohë që ka pasur debate në lidhje me ofertuesit në tendera publikë.
