Nëse objekti dëmtohet nga tërmeti apo fatkeqësia natyrore, ndërtuesi do të dënohet deri në 15 vjet burg. Kështu ka vendosur Komisioni i Sigurisë, i cili ka miratuar sot Projektligjin : “Për disa shtesa dhe ndryshime në Kodin Penal i Republikës së Shqipërisë”.
Për të bërë prezantimin e ndryshimeve te propozuara të ftuar ishin z. Klajd Karameta, zëvendësministre e Drejtësisë, Besmir Beja Drejtor në Drejtorinë e Kodifikimit dhe Juljan Hodaj zëvendësministër i Brendshëm.
Karameta shpjegoi se domosdoshmëria e ndryshimeve të Kodit Penal lindi si rezultat i situatës me të cilën u përball vendi ynë pas fatkeqësisë natyrore që ndodhi më 26 nëntor të vitit 2019. “Konkretisht” sqaroi z. Karameta, Kodi Penal paraqet vakum ligjor në drejtim të identifikimit të përgjegjësisë penale dhe ndëshkueshmërisë së subjekteve ndërtuese.”
Sipas ndryshimeve në Kodin Penal, “Kryerja e çdo veprimi tjetër me dashje, të ndryshëm nga ato të parashikuar, që mund të sjellë rrëzimin e plotë ose të pjesshëm të ndërtesave, objekteve qytetare, veprave industriale, të infrastrukturës ose të çdo objekti tjetër që mund të rrezikojë jetën ose shëndetin e njerëzve, dënohet me gjobë ose me burgim deri në 5 vjet. Kur nga vepra penale kanë ardhur pasoja të rënda materiale, dënohet me burgim nga 5 (pesë) deri në 10 vjet. Kur janë shkaktuar pasoja të rënda për jetën dhe shëndetin e njerëzve, dënohet me burgim nga 7 deri në 15 vjet.”. Dënime parashikohen edhe për qytetarët që ndërtojnë vetë për strehim dhe shtëpia e tyre dëmtohet nga tërmeti. Ata ndëshkohen megjobë ose me burgim deri në 3 muaj. Ndërsa kolaudimi i paligjshëm i ndërtimeve ndëshkohet me burgim nga 1 deri në 5 vjet. Kur nga vepra penale kanë ardhur pasoja të rënda materiale, dënohet me burgim nga 5 deri në 10 vjet. Kur janë shkaktuar pasoja të rënda për jetën dhe shëndetin e njerëzve, dënohet me burgim nga 7 deri në 15 vjet.
/GazetaReforma.com/
