Ministria e Shtetit për Administratën Publike dhe Antikorrupsionin ka reaguar ndaj lajmeve që kanë qarkulluar në media lidhur me shkurtimin e orarit të punës për punonjësit e administratës publike për shkak të temperaturave të larta. Ministria ka sqaruar se ndryshimet e propozuara në orarin e punës nuk kanë të bëjnë me kushtet atmosferike, por synojnë të prezantojnë konceptin e orarit ditor fleksibël në administratën publike.
Sipas njoftimit të ministrisë, është propozuar një ndryshim në VKM nr. 568, datë 6.10.2021, i cili përfshin krijimin e një mjedisi pune më të mbështetës për punonjësit e administratës. Kjo nismë vjen si përgjigje ndaj kërkesave të vazhdueshme të punonjësve për fleksibilitet në orarin e punës, me qëllim përmirësimin e balancës midis jetës private dhe asaj profesionale.
Projektvendimi parashikon që kohëzgjatja ditore e punës të jetë 8 orë e 30 minuta nga e hëna deri të enjten dhe 6 orë ditën e premte. Orari ditor i punës do të jetë fleksibël, me kushtin që të plotësohen orët e plota përkatëse, ndërsa fasha e detyrueshme orare kur të gjithë nëpunësit duhet të jenë në vendet e tyre të punës do të jetë çdo ditë nga ora 9:30 deri në 15:30, ndërsa ditën e premte nga ora 9:30 deri në 13:00.
Ministria thekson se kjo iniciativë synon të përmirësojë fleksibilitetin dhe efikasitetin në administratën publike, duke reflektuar nevojat e punonjësve për një orar më të përshtatshëm dhe një balancim më të mirë të jetës dhe punës. Në reagimin e saj, Ministria për Shtetin ka theksuar se ky ndryshim nuk ka lidhje me temperaturat e larta të ditëve të fundit, sikurse është publikuar më herët në Gazeta Reforma, por është një përpjekje për të injektuar fleksibilitetin në punë në mënyrë të qëndrueshme dhe për të përmirësuar mjedisin e punës për të gjithë punonjësit e administratës publike.
