Presidenti Ilir Meta ka vijuar sot me konferencën e tij javore me gazetarët.I pyetur nga gazetarët në lidhje me afatin prej 6 ditësh për të votuar në parlament ndryshimet kushtetuese, presidenti Meta tha se nuk ekziston një datë e tillë, nuk e ka vendosur as BE-ja, as NATO-ja e as Budenstagu. Për presidentin Meta ekziston vetëm një datë dhe ajo është 5 qershori, pasi është një marrëveshje ku kanë investuar të gjitha forcat politike në vend.
“Kush e ka vendosur këtë afat, Parlamenti Evropian, BE, Bundestagu, NATO, kush e ka vendosur 30 korrikun, kush e ka shpikur?Ekziston vetëm një datë e rëndësishme. 5 qershori sepse ekziston një marrëveshje ku janë investuar të gjitha forcat politike të vendit. Është e vetmja marrëveshje që mundëson rikthimin e legjitimitetit të gjithë institucioneve.Edhe nëse mund të rishikohet një element i 5 qershorit duhet rishikuar në mënyrë, konsensuale dhe gjithëpërfshirëse dhe me ekspertët ndërkombëtarë që mund të certifikojnë që çdo ndryshim i shërben mbarëvajtjes së zgjedhjeve të ardhshme.”
Më tej presidenti Meta tha se kush do që shpik një datë të re apo prek ‘5 qershorin’ duhet ta dijë që ka edhe ditë të tjera pas 30 korrikut. Por gjërat do të ndryshojnë pasi nuk do të ketë vend në tryezë për ata që mendojnë për interesat e një pakice, pasi ky është shembulli më kriminal sesi mund të përmbyset e ardhmja Europiane e vendit.
“Kush prek 5 qershorin apo kush shpik një datë me mendjen e vet që të hedhë në erë 5 qershorin, duhet ta dijë që nuk ka vetëm 30 korrik. Ka 31 korrik, ka 2 gusht ka ditë të tjera, nuk ndalon as jeta dhe asgjë, përkundrazi… Aty pastaj ka dy epoka. Nuk ka më rikthim në tryeza nga ata që përmbysin tryezat dhe kërkim të të drejtave që i takojnë një pakice pasi është dhënë shembulli më i poshtër dhe më kriminal se si për interesa të pushtetit është gati të përmbyset e ardhmja Evropiane të një vendi të tërë.”
