Ndotja e lumenjve është kthyer në një problem shqetësues në të gjithë vendin dhe ndonëse mediat raportojnë çdo ditë raste kompromentuese qeveria dhe autoritetet përkatëse vijojnë të bëjnë rolin e të verbërit.
Pas shkatërrimit të lumit Mat nga firma “Salillari” dhe “Ndue Kola Mountains”, një tjetër lum po shkatërrohet nga një biznesmen.
Bëhet fjalë për Gjergj Lucën, i cili drejton kompaninë “Rozafa” që si duket se nuk po pyet për asnjë shqetësim qytetarësh, teksa disa ditë më parë raportuam se si kompania “Rozafa” shkarkon mbetjet në lumin Shkumbin.
Së fundmi, banorët e Fushë-Labinotit janë ngritur sërish në protestë ditën e sotme.
Ata akuzojnë fabrikën e peshkut për ndotjen në Shkumbin dhe shprehet se kanë marrë kërcënime me jetë nga pronari i fabrikës së peshkut.
Njëri prej banorëve të zonës është shprehur, se kanë marrë edhe kërcënime me jetë dhe sipas tij, pronari i fabrikës së peshkut kërkon t’i marrë tokat.
“Na kanë kërcënuar me jetë. I kanë vënë pistoletën në kokë kushëririt tim. O ju vras o më jepni tokat“, thotë një banor tjetër që e kanë kërcënuar.
Jo vetëm kërcënimet me tokat, pasi një banor tjetër i zonës, akuzon pronarin e fabrikës, se ka ndotur lumin Shkumbin, duke shkarkuar mbetje.
“Shkarkonte kamionat me mbetje të karkalecit. Peshkatarët për dy vjet nuk kanë gjuajtur për peshk. Do përshkallëzojmë protestat“, u shpreh ai.
Ata gjithashtu u shprehën se nga ana e Policisë nuk u ka ardhur asnjë mbështetje dhe se çështja është në Prokurori nën hetim.
Banorët u shprehën se fabrika i hedh mbetjet direkt në lumë, dhe siç duket nga pamjet, uji ka marë një ngjyrë të kuqërremtë, teksa nga ky lum Elbasani furnizohet me ujë të pijshëm.
Biznesmeni Gjergj Luca njihet për marrëdhënien e mirë me kryeministrin Rama, madje shprehjet e tij i shkruan në muret e biznesit.
Në foto që kanë qarkullluar në rrjet shihet një thënie e Ramës e shkruar në një nga muret e biznesit të tij në Elbasan, por nuk mungon edhe portreti i këtij të fundit.
“Në demokraci forca e arsyes duhet të jetë më e fuqishme se arsyeja e forcës”, është shprehja e Ramës që shkruhet në mur.
Gjergj Luca pushtoi mediat në nëntor të 2019, kur pas tërmetit fatal bëri për ujë të ftohtë politikanët, duke i akuzuar se nuk po ndihmojnë njerëzit, teksa i ftoi të hapnin dyert e shtëpive të tyre për të pastrehët.
Mirëpo, sot Luca paraqet një tjetër anë të tijën që nuk lidhet aspak me humanizmin, madje duke shkelur edhe ligjin.
Si ministri i Turizmit dhe Mjedisit Blendi Klosi, ashtu edhe kryeministri Edi Rama janë angazhuar për ndalimin e masakrave natyrore, por realiteti është krejt i ndryshëm.
