Prej mëngjesit të së shtunës, një pjesë e vijës bregdetare të Vlorës është ndotur ndjeshëm, duke alarmuar banorët dhe pushuesit.
Segmenti nga zona e njohur si “Rrapi” deri tek vilat buzë detit është mbuluar nga një shtresë e bardhë dhe vajore që lundron në sipërfaqen e ujit.
Sipas dëshmive të qytetarëve, kjo shtresë ngjan me mbetje detergjentësh ose vajrash të përdorur, që dyshohet se vijnë nga kuzhinat e restoranteve apo nga mjetet lundruese që operojnë në zonë.
Banorët thonë se ndotja nuk është rast i izoluar, por këtë herë duket më e përhapur dhe më e rëndë. Ata akuzojnë një pjesë të bizneseve pranë vijës bregdetare për shkarkime të pakontrolluara të mbetjeve të lëngshme, përfshirë edhe ujëra të zeza.
“Deti i shkëlqyer, ndotje ka shumë. Shkarkimet e ujërave të zeza. Mundet të ketë shkarkuar ndonjë anije mbetjet që kanë ato. Nuk është mirë fare, edhe nga ana turistike. Këtu vihet me shpresën se do jetë më mirë, më lirë, më pastër.
Një tjetër shton: “Detergjentët dhe mbetjet e lokaleve përfundojnë direkt në det. Këto dy vitet e fundit uji është gjithmonë i ndotur. Edhe kur duket i kthjellët, flluskat dhe ndotja janë të pranishme.”
Disa thonë se ndotja ndryshon me kushtet atmosferike dhe lëvizjen e detit: “Në mëngjes herët, në orën 05:20 uji ishte i pastër. Por më vonë, me dallgët, nis e nxjerr mbeturinat në sipërfaqe.”
Aktualisht, nuk ka asnjë reagim nga autoritetet vendore apo Inspektorati i Mjedisit. Në kulmin e sezonit turistik, ndotje të tilla jo vetëm që dëmtojnë imazhin e Vlorës si destinacion detar, por rrezikojnë edhe ekonominë vendase që mbështetet në turizëm.
Kërkohet ndërhyrje urgjente nga institucionet për të hetuar burimin e ndotjes dhe për të garantuar pastërtinë e plazheve.
