Pas 24 orësh nga ngjarja, policia ka arrestuar bashkëpunëtoren e Astrit Thaçit, i cili grabiti një argjendari në qytetin e Elbasanit.
I njohur ndryshe si “Skifteri i Durrësit”, 27-vjeçari ra në prangat e policisë së Tiranës, në zonën e Kombinatit, pasi kërcënoi me armë punonjësen dhe mori një sasi florinjsh me vlerë 30 mijë euro, vetëm 20 metra larg Drejtorisë së Policisë.
Pas grabitjes ai u ndihmua të arratisej nga një 20-vjeçare me iniciale A.B., e cila ra në pranga ditën e sotme.
Mbi bazën e provave të siguruara nga Policia e Durrësit, në bashkëpunim me Prokurorinë nga veprimet proaktive të kryera, specialistët për hetimin e krimeve në Komisariatin e Policisë Durrës mundën të arrestonin 20-vjeçaren.
Materialet i kaluan Prokurorisë së Rrethit Gjyqësor Durrës, për veprën penale “Përkrahja e autorit të krimit”.
Më herët, Policia e Shtetit ka dhënë detaje të tjera për arrestimin e 27-vjeçarit, autor i disa grabitjeve e tentativash për vjedhje me dhunë e armë.
Ai ka qenë i dënuar më parë me 7 vite burg në Itali dhe është autor i 8 grabitjeve: 3 në Durrës, 4 në Tiranë dhe 1 në Elbasan.
Materialet procedurale do t’i referohen Prokurorisë së Rrethit Gjyqësor Durrës, Tiranë dhe Elbasan, për veprën penale “Vjedhja me armë, e mbetur në tentativë”, “Plagosja e rëndë me dashje”, Vjedhja me dhunë” dhe “Vjedhja e bankave dhe arkave të kursimit”.
