Nëpërmjet një postimi në rrjetet sociale, kryeministri Edi Rama ka njoftuar se ka nisur shpërndarja e pagesave për punonjësit e bizneseve të vogla që janë mbyllur për shkak të COVID-19.
Më tej ai bën me dije se po vijojnë verifikimet për bizneset e tjera që kanë bërë aplikimin.
Shefi i qeverisë ka shtuar se në mesin e biznesve që do të përfshihen në paketën e zgjeruar financiare janë taksitë, serviset e makinave, lavazhet, rrobaqepësit, bojaxhinjtë, hidraulikët, elektriçistët, fizioterapistët, etj.
Në paketë do të përfshihen edhe qiradhënësit, të cilët nuk kanë burim tjetër të ardhurash përveç qirasë dhe individët që kanë humbur punën për shkak të epidemisë.
Kujtojmë këtu se ditën e djeshme, Rama premtoi se brenda 15 prillit do të jetë gati paketa e zgjeruar financiare, ndërsa do të ketë edhe disa lehtësime të masave shtrënguese.
Postimi i plotë
PËRDITËSIM I PAGESAVE PËR PUNONJËSIT E BIZNESEVE TË VOGLA QË JANË MBYLLUR NGA LUFTA
VAZHDOJNË PËRDITË VERIFIKIMET E APLIKIMEVE DHE LËVRIMI I PAGAVE TË LUFTËS
BIZNESE TË TJERA TË VOGLA TË REGJISTRUARA SI TAKSI, SERVISE MAKINASH, LAVAZHE, RROBAQEPËSI , BOJAXHI, HIDRAULIK, ELEKTRIÇIST, FIZIOTERAPI, ETJ., DO TË PËRFSHIHEN NË PAKETËN E ZGJERUAR
*Paketa e Zgjeruar do të adresojë me një bonus lufte edhe hallin e individëve qeradhënës që nuk kanë të ardhura të tjera veç qerasë apo të individēve që u është pamundësuar puna në kompani e ndërmarrje me xhiro mbi 140.000 lek në vit. Për përcaktimin e masës së kësaj mbështetjeje me Bonusin e Luftës, do të vendoset duke ndjekur dinamikën e luftës në 3/4 ditët në vijim.
Ditën e sotme u regjistruan 9 raste të reja me COVID-19, duke e çuar numrin e përgjithshëm në 409.
Gjithashtu gjatë 24 orëve të fundit u shëruan edhe 11 pacientë të tjerë, duke e çuar numrin në total 164, ndërsa janë shënuar edhe 22 viktima.
Në spitalin Infektiv ndodhen 52 të shtruar, 5 prej të cilëve në terapi intensive.
Ndërsa tek “Shefqet Ndroqi” janë shtuar 6 pacientë të tjerë, 5 prej të cilëve në terapi intensive, ku 4 janë intubuar.
