Çmimi i karburanteve është në “stratosferë”, ku çdo vendim i bordit është zhgënjyes për qytetarët.
Teksa çmimet janë të papërballueshme, qyetatrët mundohen të gjejnë “zgjidhje” alternative.
Ditën e sotme, policia ka arrestuar një 35-vjeçar në Tiranë, i cili ka vjedhur një sasi të konsiderueshme nafte nga ekskavatori, në një kantier ndërtimi. Në pranga është vënë dhe një shtetas tjetër që përvetësoi naftën e vjedhur.
Bëhet me dije se Policia e Tiranës ka finalizuar operacionin e koduar “Fuel”, për goditjen e veprimtarisë kriminale në fushën e vjedhjes.
Njoftimi i policisë:
Shërbimet e Komisariatit të Policisë Vorë, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve para përgjegjësisë ligjore, pas një pune të mirëfilltë hetimore, organizuan dhe finalizuan me sukses operacionin policor të koduar “Fuel”.
Si rezultat i operacionit u vunë në pranga shtetasit:
– J. S., 35 vjeç, banues në Vorë, për veprën penale “Vjedhja”;
– P. K., 31 vjeç, banues në Vorë, për veprën penale “Përvetësimi i parave ose mallrave që rrjedhin nga vepra penale ose veprimtaria kriminale”.
Nga verifikimet e kryera ka rezultuar se shtetasi J. S., ka vjedhur rreth 172 litra karburant, nga ekskavatori i një firme ndërtimi dhe më pas ia ka shitur shtetasit P. K., i cili ishte në dijeni që karburanti që kishte blerë, ishte i vjedhur.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.
