Pas ndërtimit të objekteve pa leje në zonën e mbrojtur të Thethit, Policia e Shkodrës është goditur nga një “furtunë” shkarkimesh. Drejtori i Përgjithshëm i Policisë së Shtetit, Ilir Proda, ka vendosur të largojë nga detyra drejtuesit kryesorë të strukturave vendore në këtë qark, duke i akuzuar për mosveprim të pajustifikueshëm përballë shkeljeve ligjore.
Në një konferencë për mediat, Proda njoftoi shkarkimin e drejtorit të Policisë Vendore Shkodër, Fatmir Lleshaj, si dhe të shefit të Komisariatit të Policisë së Shkodrës, Nik Nikolla. Gjithashtu, është pezulluar nga detyra shefi i Stacionit të Policisë në Theth, ndaj të cilit ka nisur një hetim disiplinor.
“Nisur nga situata e krijuar në qendër të Thethit, kam urdhëruar një hetim të thelluar. Shefi i stacionit të Policisë në Theth është pezulluar menjëherë nga detyra dhe ndaj tij kanë nisur procedurat disiplinore. Me mosveprimin e tij të pajustifikueshëm, ai vetë ka zgjedhur të mos jetë më pjesë e Policisë së Shtetit. Nuk shoh më asnjë arsye që ai të mbajë uniformën e policisë,” u shpreh Proda.
Ai theksoi se përgjegjësia për ndërtimet pa leje nuk mund të mbetet vetëm tek një inspektor zone apo specialist krimesh, ndaj edhe është marrë vendimi për të larguar nga detyra kupolën drejtuese të Policisë në Shkodër.
“Drejtuesit e policisë në Shkodër nuk kanë zbatuar detyrën dhe kanë lejuar ndërtimet pa leje. Do të mbajnë përgjegjësi nëse mbyllin sytë dhe nuk reagojnë para se ta konstatojmë ne apo komuniteti,” theksoi kreu i Policisë së Shtetit.
Proda paralajmëroi se masa të ngjashme do të merren edhe në qarqe të tjera nëse konstatohet tolerim apo mosreagim përballë shkeljeve. Ai njoftoi gjithashtu se janë hapur procedura disiplinore edhe ndaj inspektorëve të zonës dhe specialistëve të krimit në Policinë e Shkodrës, të cilët, sipas tij, “nuk e meritojnë të jenë pjesë e strukturës”.
“Lirimi i hapësirave publike dhe kontrolli mbi ndërtimet pa leje do të jenë prioritete të Policisë së Shtetit në ditët, javët dhe muajt në vijim,” u shpreh më tej Proda, duke paralajmëruar se çdo rast neglizhimi do të trajtohet me zero tolerancë.
